Бертуган Хуҗиннар - әтиләре һәм абыйларының төп ярдәмчеләре

Ислам һәм Илсаф Хуҗиннар өченче сезон инде районда урып-җыю чорында әтиләре Илназга һәм абыйлары Ниязга ярдәм итәләр. Кечкенәдән комбайнчы әтиләре Дамирның ун куллары булган Илназ да, Нияз да күп еллар районда урак батырлары булдылар. Бу эшкә Илназның уллары Ислам белән Илсафны да өйрәткәннәр. Менә инде өч ел малайлар кызу чорда аларның ярдәмчеләре булып эшлиләр.

Уртак тырышлык нәтиҗәсе - Хуҗиннар урак башланганнан бирле беренчелекне беркемгә дә бирмиләр.

- Комбайнны туктатып торган юк. Төшке ашка да туктап, вакыт сарыф итмибез. Беребез эшли тора, икенчебез тамак ялгап ала, - ди Илсаф.