Сарсак-Омгадан Сергей–Галина Николаевлар узган Яңа ел бәйрәмендә лотереяга үгез бозау оталар

“Сарсак-Омга” хуҗалыгы җитәкчесе Разиф Харисов Яңа ел бәйрәмендә лотерея уены өчен ел саен ике үгез бозау бирә. Аның беренчесен яшьләр бал-маскарадында уйнаталар, икенчесен – өлкәннәр өчен оештырылучы искечә Яңа елда.

Узган ел бал-маскарадта бозау Сергей–Галина Николаевларга чыккан. 

–    Әлбәттә, бу безнең өчен бик зур сөенеч булды. Дөрес, элек тә лотереяга әйберләр чыкканы бар иде. Әмма күп чакта вак-төяк эләкте. Мондый зур бүләкне беренче тапкыр оттык, – ди Галина.  

Үгез елы башланыр алдыннан нәкъ менә әлеге тере “Яңа ел бүләге”нең хәлен белергә дип без Сарсак-Омгага барып кайттык.    

–    Галина әлеге лотереяны оныгыбызга дип атап алган иде. Димәк, бу – аңа елмайган уңыш, – ди Сергей. 

Әнә шулай, үз бозаулары белән рәттән абзарларында лотереяга отканы урын алган.

Сергей Сарсак-Омгада туып-үскән, Галина – Әлнәш районыннан. Алар әти-әниләре белән бергә яшиләр. Зур яңа йорт төзеп кергәннәр. Күптән түгел уллары Владислав армия сафларыннан кайткан. Кызлары Анастасия Ижауда үз гаиләсе белән яши. Ә лотерея билеты аның улы Тимофейга дип атап алынган булган. Тимошага әле ике генә яшь. Ул – әби-бабасы янында еш кунак. Кайткан саен зурлар белән бергә каз-үрдәкләр, бозаулар янында кайнашырга ярата. Шунда песи балалары белән дә уйнап ала. Яраткан эте Бимка да аны сагынып көтеп ала. 

–    Тимофей хуҗалык буйлап йөрергә ярата. Бозаулар кечкенә чакта аларны сыйпарга дип абзарга да еш керә иде. Хәзер бозаулар инде үсте. Аны янына җибәрмиләр, – ди бабасы. 

Чыннан да, бозаулар үскән. Яңа елда откан бозау да чын үгезгә әйләнгән. Бу эш сөючән гаиләгә алга таба да көтелмәгән җирдән шундый уңышлар насыйп булсын иде.