Авыл тормышы
Кадыбашлылар буа буен чүп-чардан арындырды
Кадыбаш авыл җирлеге башлыгы Илфат Рамазанов җитәкчелегендә авыл Советы, Мәдәният йорты хезмәткәрләре, укучылар, хәтта балалар бакчасында тәрбияләнүче малай-кызлар да әлеге авыл янәшәсендәге буа ярларын чистартырга чыкканнар.
- Иртә яздан кара көзгә кадәр биредә берничә тапкыр өмә уздырабыз. Быел республика күләмендә акция игълан ителгәч, аңа олысы-кечесе бик теләп кушылды. Авылдашлар, читтән килүчеләр өчен иң матур ял итү урыны булган буабызның тирә-юне балкып торсын дигән максат куйдык. Җыйнаулашып эшләү бик рәхәт булды, – ди Мәдәният йорты директоры Алсу Сибатова.
Уртак тырышлык белән ун капчык чүп – консерв банкалары, пакетлар, пыяла ватыклары җыелган. Һәвәскәр балыкчылар белән табигать байлыкларын саклау буенча әңгәмәләр уздырганнар.
- Тырышып эшләгәннән соң, табигать кочагында ял иттек. Учакта чәй кайнады, тәм-томнар белән сыйландык, – ди Алсу.
Кадыбашлылар бик тиздән тагын күмәкләшеп өмәгә чыгу турында да сөйләшкәннәр. “Авылга керү юлындагы буабыз һәрвакыт көлеп торырга тиеш“, диләр алар.
Следите за самым важным и интересным в Telegram-каналеТатмедиа
Районыбызга кагылышлы яңалыклар белән безнең Telegram-каналдан танышыгыз
Нет комментариев