Тотылган машина аласызмы? КИҢӘШЛӘРне истә тотыгыз

Миллионнарча сумлык яңа автомобиль сатып алу һәркемнең кулыннан килерлек эш түгел хәзер. Бәяләре бертуктаусыз арта, ә кесә ягы чамалырак. Машинасыз да булмый, шуңа күрә тотылганына гына күз саласы кала. 

Шактый «йөгергән» булса да, әйбәт кенә сакланганын ничек табарга һәм сайларга? Автоэксперт Евгений Завьяловның киңәшләрен тәкъдим итәбез. 

-Артык арзанлысына кызыкмагыз. Акча кызгану якын киләчәктә үк бер-бер артлы кыенлыклар китереп чыгара башларга мөмкин.  

-Сатучыга шалтыратып, машинаны карарга барганчы, игъланны әйбәтләп карагыз. Автомобильнең барлык ягыннан, шул исәптән салонында төшерелгән фотосурәтләре булырга тиеш.  

-Сатучы үзенең товары турында барысын да сөйләргә бурычлы. Машина авариягә очраганмы-юкмы, нинди кимчелекләре бар, нәрсәләре алыштырылган… Фотосурәтләрен караганнан соң ниндидер сорауларыгыз туса, телефон аша барысын да белешегез.

-Хәзер җир асты паркингларында, сак астындагы стоянкаларда еш кына «кара» салоннар ачучыларны очратырга туры килә. Кемнәрдер «күрмәгәне калмаган» машиналар сатып ала да, шуларны төзәтеп, шомартып-ялтыратып куя һәм паркингларда сата. Мондыйлар гадәттә машинаның кайда икәнлеген әйтми: метро, АЗС кебек урыннарда очрашу билгели дә, шуннан соң гына алып барып күрсәтә.  

-Автомобиль хуҗасының барлык документлары: шәхси паспорты, ПТС, теркәү турында таныклыгы булырга тиеш. ВИН-номерларын чагыштырып карагыз. Төрле ышанычнамәләр, документ дубликатлары шик тудырырга тиеш. СТС номерын күчереп язарга яки фотога төшерергә онытмагыз: машинаны базалар буенча тикшергәндә кирәк булачак ул. 

Белеп торыгыз: интернет аша рәсми рәвештә автомобильнең «башыннан үткәннәре» турында бик күп мәгълүматлар алырга мөмкин. ДАИ сайтында ВИН-код буенча машинаны теркәү, аварияләргә эләгүе, эзләүдә булуы, чикләүләр салынуы турында белергә була.

Чыганак