Авариягә эләккән егет, иптәшен ярдәмгә чакырган, алар икесе дә үлгән

Омск шәһәре янындагы Ачаир бистәсендә куркыныч һәлакәт була, дип хәбәр итә Эчке эшләр министрлыгы.

30 яшьлек егет, машинасы белән идарәне югалтып, юл читендәге электр баганасын бәрдерә. Нәтиҗәдә Покрово-Иртышское авылына бара торган чыбык өзелә. Авыл утсыз кала. Егет үзенә янаган куркынычны аңлап бетерми, 25 яшьлек иптәшенә шалтырата, машинасын алып китүдә ярдәм итүен сорый. Иптәше тиз арада килеп җитәчәген әйтә, машинага ут капмасын өчен аккумуляторны өзәргә киңәш итә.

Аккумуляторны өзгәндә егетне җиргә төшкән чыбыктан ток сугып үтерә.

Ярдәмгә килгән иптәше егетнең ни сәбәпле үлгәнен аңламаган дип фаразлана. Машинага капланып яткан дустын күргәч, ул аңа ярдәмгә ашыга. Машина янында аны да ут сугып үтерә. 

Чыганак: Интертат