Үги ата улының кулларын һәм аякларын кызган үтүк белән яндырган

Кемерово өлкәсенең Новокузнецкий районында яшәүче 32 яшьлек ир-ат 11 яшьлек үги улын җәзалап торган. Ул баланың кулларын һәм аякларын кайнар үтүк белән пешергән. Ир-атка карата җинаять эше ачылган, аңа гаепләү белдерелгән. Бу турыда Россия Тикшерү комитетының Кемерово өлкәсе буенча Тикшерү идарәсенең матбугат хезмәтенә сылтама белән «Комсомольская правда» хәбәр итте.

Бала берничә көн мәктәпкә килми торгач, аны үги атасы газаплавы турында билгеле була. Укытучылар полициягә мөрәҗәгать итә.

Әлеге гаиләгә инспекторлар бара һәм тәне пешеп беткән баланы күреп алалар. Малайның ботлары, балтырлары, тез башлары, уң кулы пешкән. 

Бала хокук саклаучыларга сөйләгәнчә, аны үги әтисе үтүк белән пешергән. Алдагы көнне әнисе өйдән чыгып киткән, бала үги ата белән генә калган. Ир-ат баланы газаплаган. Аннары ашыгыч ярдәм дә чакырып тормаганнар.

Хәзер баланы бу гаиләдән алганнар, ул әлегә хастаханәдә дәвалана. 

Соңрак ачыкланганча, бу ир-ат малайны инде берничә тапкыр җәзалаган. Әни кеше баласын якламау сәбәбе әлегә билгеле түгел. Аны да җинаять җаваплылыгына тартырга җыеналар. Бу хатын өлкәнрәк ике баласы өчен ана булу хокукыннан мәхрүм ителгән, диелә хәбәрдә.

Чыганак: Интертат 

Фото: pixabay.com