Соңгы кыңгырау бәйрәменә әзерләнгәндә укучы кыз егылып үлгән
Мәрхүмә кызның анасы баласында җитди авыру булуын кире кага
Чиләбе өлкәсенең Миасс шәһәрендә мәктәптә концерт репетициясе вакытында 9 яшьлек кыз үлә. Икенче сыйныфта укучы баланың җитди авыруы булган дигән версия бар. Тик туганнары моны кире кага. Тикшерү бара. Бу турыда "Комсомольская правда" хәбәр итте.
18 майда актлар залында Соңгы кыңгырау бәйрәмен кабатлыйлар. Сәхнәгә хореография түгәрәгендәге кызлар чыга. Музыка уйный башлый. Шул чакта бер бала егыла. "Кыз егылды да үлде", - ди шаһитлар.
Башка балалар башта берни дә аңламый тора. Егылган кыз хәрәкәтсез ята. Кызлар аның янына йөгереп килә, олылар баланы торгызмакчы була, ләкин бала аңсыз кала. Ашыгыч ярдәм чакыралар, табиблар баланың үлүен раслый.
"Комсомолка" хәбәрчесе мәктәптәге кешеләрдән сораштырып караган. Тик директор комментарий бирмәскә кушуларын әйткән. Тикшерү барышына сылтама белән, Миасс мэриясендә дә җавап бирүдән баш тартканнар.
Мәрхүмә кызның анасы баласында җитди авыру булуын кире кага. "Баланың сәламәтлегендә ачыкланган бернинди дә проблема юк иде", - дип яза ул социаль челтәрләрдә. Тик "Комсомолка" хәбәрчесенә аңлатма бирми.
Чыганак: Интертат
Районыбызга кагылышлы яңалыклар белән безнең Telegram-каналдан танышыгыз
Иң мөһим һәм кызыклы язмаларны Татмедиа Telegram-каналында укыгыз
