Әгерҗедә Коръән укучылар бәйгесе узды

Бүген Әгерҗенең "Нур" мәдрәсәсендә Коръән укучылар бәйгесе узды.

Башка еллардан аермалы буларак, быел бәйгедә катнашучыларның яше чикләнмәгән иде. Бәйгенең иң кечкенә катнашучысы - Чишмәдән ике яшьлек Яхъя Корбанов жюри әгъзаләрен дүрт сүрәне яттан сөйләп шаккатырды. Әгерҗедән өч яшьлек Алиша Тарисова да белгән сүрәсен бик аһәңле итеп укып җиткерде. Ә гомумән алганда, бәйгедә 40тан артык бала үз көчен сынады. Призерларга бүләкләр тапшырылды. Мул итеп табын да әзерләнгән иде.