Әгерҗе хәбәрләре
  • Рус Тат
  • Әгерҗедә мәетне соңгы юлга озату күпмегә төшә

    "Хәзер Әгерҗедә мәетне Ислам дине йолалары буенча соңгы юлга озату күпмегә төшә икән? Шул хакта аңлатып язсагыз иде". А.Шакирова. Әгерҗе шәһәре. Әлеге сорауга татар зираты каравылчысы Илдус Гыйләҗетдинов җавап бирә. - Сорауга җавап биргәнче, шунысын искәртеп кую урынлы булыр: мәрхүмне соңгы юлга озату бәяләрен 5-6 ел үзгәрткәнебез юк инде. Тик,...

    "Хәзер Әгерҗедә мәетне Ислам дине йолалары буенча соңгы юлга озату күпмегә төшә икән? Шул хакта аңлатып язсагыз иде".

    А.Шакирова.

    Әгерҗе шәһәре.

    Әлеге сорауга татар зираты каравылчысы Илдус Гыйләҗетдинов җавап бирә.

    - Сорауга җавап биргәнче, шунысын искәртеп кую урынлы булыр: мәрхүмне соңгы юлга озату бәяләрен 5-6 ел үзгәрткәнебез юк инде. Тик, ничек кенә булмасын, чыгымнарсыз булмый. Кабер казыган өчен безнең бригада егетләренә 5 мең сум түләргә кирәк. Әгәр каберне мәрхүмнең үз туганнары казырга теләк белдерә икән, без каршы килмибез. Каберне үз якыннары казыган очракта саваплырак та әле. Моңа өстәп, ләхет алучы өч кардәшебезгә 500әр йөз сум бирергә кирәк. Машина хезмәте - 1 мең сум. Бу суммага мәетне моргтан алып кайту, зиратка көрәкләр алып бару кебек хезмәтләр керә. Сайгак-такталар комплекты -1600 сум. Үзләренеке булган очракта без шул материалларны кулланырга да каршы килмибез.

    Өч мәет юучыга 500әр сум бирелә. Өйдә укыган өчен муллага хәер, гүр сәдакасы тапшырыла, кардәшләребезгә сәдака таратыла. Муллага, гадәттә, 200 сум бирәләр, гүр сәдакасы - 300 сум. Бу сәдаканы мулла мәчеткә тапшыра. Ә менә хәерне кем күпме булдыра, шуның кадәр тарата.

    Мәеткә зиратта җеназа намазы укыган муллага, гадәттә, 200 сум сәдака бирәләр. Зиратта да кем күпме булдыра ала, шуның кадәр хәер тарата.

    Мәетне соңгы юлга озату өчен кәфенлек, башка кирәк-яраклар кирәклеген дә онытмагыз. Сүз уңаеннан: кәфенлек һәм башка кирәк-яраклар комплекты Әгерҗенең "Хәсән" мәчетендә - 900 сум. Монысын да әлеге мәчеттә комплект өчен бәянең түбән булуын искәртеп кенә әйтүем. Кемгә каян уңайлы, шуннан алса да ярый, - дип сөйләде Илдус Гыйләҗетдинов.

    Ә безгә гади арифметика белән шөгыльләнәсе генә калды. Мәетне соңгы юлга озату уртача 15 мең сумга төшә. Әйе, юкка гына "Мәет ача, тере яба", димиләр шул.

     

    Районыбызга кагылышлы яңалыклар белән безнең  Telegram-каналдан танышыгыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: