Камил Сәмигуллин: Ир белән хатын иманлы булса, гаилә дә нык була

Татарстан мөфтие Камил хәзрәт Сәмигуллин җомга нәсыйхәтендә әйткәнчә, әгәр ир белән хатын иманлы булса, бу гаилә нык булачак. Бу турыда Татарстан Диния нәзарәтенең матбугат хезмәте хәбәр итте.

Камил Сәмигуллин пәйгамбәребез Мөхәммәд сүзләрен искә төшерә. «Булачак хатыныгызда дүрт нәрсәгә игътибар итегез: байлыгына, нәселенә, матурлыгына һәм диндә булуына. Диндә булганына ирешергә тырыш, юкса оттырырсың!» — ди.

Ул тагын бер хәдисне дә әйтә: «Һәрберегез — көтүче, һәм һәрберегез үз көтүе өчен җаваплы булачак. Имам (җитәкче) — көтүче, ул үзенең халкы өчен җавап бирер. Ир — үз гаиләсендә көтүче, шул хакта җавап бирер. Хатын — өендә көтүче, шул хакта җавап бирер», — диелә.

Дөнья — мәшәкать йорты, һәм тормышта төрле хәлләр килеп чыгарга мөмкин. «Шуңа кешеләр бер-берләренә юл бирә белергә тиеш. Тар юлда машиналар бер-берсенә юл бирмәсәләр, алар һәлакәткә юлыгачаклар. Шулай ук ир белән хатын да үзара килешмәсәләр, аңлашмасалар, ачуланышуга, сугышуга, хәтта, Аллаһы сакласын, аерылуга җитәргә мөмкин», — ди ул.

«Әгәр ир белән хатын икесе дә иманлы һәм диндә булсалар, бу гаилә, иншә Аллаһ, нык булачак. Аллаһы Тәгалә барлык гаиләләргә һидаять, нык иман, тынычлык, иминлек биреп, сабырлык һәм ризалыкта, үзара күркәм мөнәсәбәттә булырга насыйп итсен», — ди Камил хәзрәт Сәмигуллин.

Чыганак