Кол Шәриф Россия могҗизасы булсын

Казанның Кол Шәриф мәчете Идел буе Федераль округының төп символлары унлыгына кергән.
"Россия 1" телеканалының Россия география җәмгыяте белән берлектә үткәрүче "Россия-10" конкурсына март аенда ук старт бирелгән иде. 29 сентябрьгә кадәр бөтен халыкның тавыш бирүе ярдәмендә илнең ун төп истәлекле тарихи-мәдәни объекты ачыкланачак. Мәскәү өлкәсендәге "Россия" ландшафт паркында аларның кечерәйтелгән күчермәләре урнаштырылачак.
Тавыш бирү өч этапта уза. 30 июньгә кадәр һәр төбәк тәкъдим иткән иң яхшы ун объектны сайлап алачаклар. Аннан тавышлар юкка чыгарыла һәм 1 июльдән 1 сентябрьгә кадәр дәвам итәчәк икенче турда финалда катнашучы 30 һәйкәл сайлап алыначак. Безнең Кол Шәриф мәчете - әлегә унлыкның бишенче урынында. Аңа 200 меңгә якын кеше тавыш биргән инде. Кол Шәриф мәчетенә 30 июньгә кадәр лидерлар исемлегеннән төшеп калмыйча, үз рейтингын арттыру өчен сезнең ярдәм кирәк, райондашлар. Моның өчен бары ике көн вакыт калды. 10russia сайтына кереп, тавыш бирегез. Һәр компьютердан көнгә өч тапкыр тавыш бирергә була. Кол Шәриф Россия могҗисы булсын өчен бергәләп көрәшик