Эгерже хэбэрлэре
  • Рус Тат
  • Әбиләр дә, бәбиләр дә чират көтә

    Район хакимиятенә шәһәребездәге банкларда бик еш зур чиратлар тезелүе, эштәге кешегә төрле түләүләрне түләп чыгыйм дисә, еш кына бер сәгатькә якын вакыт кирәк дип зарланып килүчеләр яки телефоннан хәбәр итүчеләр еш була. Район җитәкчелеге банкларлардагы хәлләр белән танышу өчен Әгерҗедәге өстәмә офисларның операция заллары буйлап йөреп кайтты һәм аларның җитәкчеләрен...

    Район хакимиятенә шәһәребездәге банкларда бик еш зур чиратлар тезелүе, эштәге кешегә төрле түләүләрне түләп чыгыйм дисә, еш кына бер сәгатькә якын вакыт кирәк дип зарланып килүчеләр яки телефоннан хәбәр итүчеләр еш була. Район җитәкчелеге банкларлардагы хәлләр белән танышу өчен Әгерҗедәге өстәмә офисларның операция заллары буйлап йөреп кайтты һәм аларның җитәкчеләрен эшлекле сөйләшүгә җыйды.
    Аеруча "Ак Барс" һәм "Татфондбанк"ның өстәмә офисларында чиратлар булуыннан зарлана халык. Монда дөреслек бар, әлбәттә. Бигрәк тә коммуналь түләүләргә счет-фактуралар килгәч, айның 10-20 числоларында халык банкларга агыла, нәтиҗәдә, чиратлар барлыкка килә. Ә ай башында һәм ай ахырында бер генә банкта да чиратлар юклыгына үзебез дә ышанып кайттык. Шул ук вакытта бу түләүләрне бернинди чират тормыйча шәһәребездәге "Лукошко", "Әгерҗе", "Магнит", "Эссен" сәүдә үзәкләренә куелган терминаллар аша түләргә мөмкин. Ә кем хезмәт хакын банк карталары аша ала, аларга өйдән чыкмыйча Интернет аша түләү мөмкинлеге дә зур бит хәзер. Ә эшләгән кешегә түләү өчен төшке аш вакытында да "Ак Барс" һәм "Татфондбанк" офисларында кассалар эшли. Саклык банкында исә бөтен төр түләүләрне терминал аша бернинди чират тормыйча түләп чыгарга була. Кайберәүләр ЮХИДИ штрафларын фәкать "Ак Барс"та гына кабул итәләр дип беләләр. Юк, бу штрафларны һәм балалар бакчалары өчен түләүләрне "Татфондбанк"та да түләргә була. Биредә тиздән терминал куелачагын да хәбәр итте өстәмә офис җитәкчесе Ирина Поносова.
    Бигрәк тә кулында хезмәт хакы яки пенсиясе күчерелгән пластик картасы булган кешегә чиратларда торып вакытын әрәм итәсе юк бит хәзер, җәмәгать. Теләсә кайсы терминалда рәхәтләнеп түлә, озын чиратларда нервың да бетми.
    Ишетмәгәннәр өчен тагын бер шатлыклы хәбәр: узган ел ахырында шәһәребезнең Пушкин урамында "Мособлбанк"ның операция залы ачылды. Терминал һәм Интернет аша түли белмибез диючеләр өчен бу банкның эш режимы аеруча уңайлы. Иртәнге сәгать 9дан кичке 8гә кадәр эшлиләр һәм түләүләр өчен бернинди комиссия взносы алынмый.
    Район җитәкчелеге банклар буйлап йөргәндә "Татфондбанк" бинасына урнашкан Теркәү һәм кадастр палаталары бүлекләре урнашкан залга да керде һәм ... зал тулы халыкны күреп, "телсез" калды. Озын чиратлар, залда тынчу, клиентларга утырырырга урындыклар җитми. Чираттагыларның күбесе - авыл кешеләре. Аеруча ерактан Бима, Кадрәктән килгән халыкның ачуы аеруча яман. Барысы да җир пайларын теркәү мәсьәләсе буенча килгәннәр. Бүген чират җитәрме икән дип борчылалар. Әнә, Яңа Аккуҗадан Касыймовлар - гаиләләре белән биредә. Иртәнге 8дән бирле әти-әнисе һәм әбисе белән чиратта торган 1,3 яшьлек сабый шунда тамагын туйдырып, урындыкта йокыга киткән, мескенкәем (рәсемдә). Әле төшкә кадәр чиратлары җитәрме, билгесез. Һәр клиентка хезмәт күрсәтү өчен кимендә 40-45 минут вакыт кирәк, диләр. Бу нәнигә тынчу залда тагын күпме газап чигәргә туры килгәндер бу көнне?
    Теркәү палатасы бүлеге җитәкчесе Юлия Шәрипова: "Әнә Исәнбай, Красный бор, Яңавыл җирлекләре башлыклары, барлык авылдашларының җир пайлары буенча кирәкле документларын җыеп алып килеп, бу катлаулы эшне үзләре ерып чыктылар. Әлеге авыл кешеләре Әгерҗегә килеп, мондый озын чиратларда газап чикмәделәр. Башка авыл башлыклары да шулай эшләсәләр, халык өчен ничек уңайлы булыр иде бит", - ди. Январь-февраль айларында авылларда узган отчет җыелышларында район җитәкчелеге халык алдында авыл башлыкларына нәкъ шундый бурыч куйган иде бит. Һәр авылда халыкны кат-кат Әгерҗегә йөртмичә, җир пайларын теркәү мәшәкатен авыл башлыклары үз өстенә алырга тиеш дигән катгый бурычны оныткан башлыкларга район җитәкчелеге яңадан исләренә төшерергә мәҗбүр булды. Җир пайларын теркәргә теләүче һәркемнең бу мәсьәлә буенча фәкать авыл җирлеге Советына мөрәҗәгать итәргә тиешлеген сезнең дә исегезгә төшерәбез, хөрмәтле райондашлар.
    Рәмзия Зарипова.

    Нравится
    Поделиться:
    Реклама
    Комментарии (0)
    Осталось символов: