Әгерҗедә йортлар төзү дәвам итә

- Заманалар катлаулана барса да, туган республикабызда, шул исәптән Әгерҗе районында да зур төзелешләр дәвам итәчәгенә ничек сөенмисең инде?! Бу бит халыкның тормыш-көнкүрешен яхшырту дигән сүз. "Быел да социаль юнәлештәге утызлап программаны дәвам итү өчен моңа кадәр ныгытылган икътисади көчебезгә таяначакбыз", - диде Рөстәм Миңнеханов та.

- Әгерҗе шәһәрендә авария хәлендәге баракларны киметү, анда яшәүчеләрне яңа фатирларга күчерү буенча быел да эш дәвам итәчәк. Чайковский һәм Ометов урамнарындагы 24әр фатирлы ике өчәр катлы йортны файдалануга тапшырачакбыз. Район үзәк хастаханәсенең йогышлы авырулар бүлеге итеп төзелә башлаган бинаны табибларга торак йорт итеп үзгәртү эшләре дәвам итәчәк. Моннан тыш, районда авыл хуҗалыгы хезмәткәрләре өчен җиде йорт төзү планлаштырыла.

- Иң сөенечлесе, Күләгәштә әлегәчә утын ягып җылытыла торган тузган агач мәктәп тарихка гына кереп калыр дип өметләнәбез. Быел Күләгәштә яңа мәктәп төзелә башлаячак. Иж-Бубый, Девәтернә һәм Бима мәктәпләре капиталь ремонт программасына кертелде. Бимада бу эш инде ахырына якынлашып килә. Рөстәм Миңнеханов быелдан башлап балалар бакчаларын ремонтлауга зур игътибар биреләчәген әйтеп узган иде. Красный бор балалар бакчасының капиталь ремонт программасына кертелүе Президентыбызның бу сүзләрен раслап тора. Азево һәм Иске Чекалда мәктәпләренең бик нык тузган котельныйларын ремонтлау күздә тотыла. Салагыш Мәдәният йортында да котельный ремонтланачак.

Красный бордагы "Наз" приютын да сөендерә алам. Быел бу бинада да ремонт булачак.

- Кам. Ключта, Тәбәрледә ФАП төзеләчәк. Ә Көчек авылында ветеринария станциясе ачылачак.

- Әгерҗенең "кирпичка" микрорайонында соңгы елларда шактый төзекләндерү эшләре башкарылды, матур үзгәрешләр булды. Яңа клублы булу - биредә яшәүчеләрнең күптәнге хыялы...

- Шәһәрдә күпкатлы йортлар ишегалларында, шулай ук авылларда спорт мәйданчыклары төзү дәвам итәчәкме?

- Әйе. Быел Тирсәдә - ике, Әгерҗедә Заводская урамындагы 61а һәм 47а йортлары ишегалларында спорт мәйданчыклары калкып чыгачак.

- Быел Энергетиклар, Комсомольская урамнарын төзекләндерү көтелә. Нариманов урамында төзекләндерү эшләре тәмамланачак. М.Горький урамындагы 1 һәм 2нче йортлар ишегаллары территорияләрен төзекләндерәчәкбез. Энергетиклар урамына вак таш-ком катнашмасы түшәләчәк. Шаршадыда Лесоводов, Кичкетаңда Таҗи Гыйззәт, Кадрәктә Заречная, Азевода Советская, Ямурзада Речная,, Иж-Бубыйда Үзәк урамнар төзекләндереләчәк.

- Без шәһәрдәге Әгерҗе елгасы ярын (К.Маркс урамындагы күпер тирәсендә) төзекләндерүне планга керттек. Биредә нинди эшләр башкарылачак, әлегә сер булып калсын.

- Ниһаять, 2016 елда Әгерҗе ЗАГСының үз бинасы булыр дип өметләнәбез. Белүемчә, бу - әгерҗелеләрнең күптәнге хыялы.Октябрьская урамында ("Яшьлек" паркы каршында) өч катлы бина төзелә башлады. Аның беренче катында ЗАГС идарәсе, ә икенче-өченче катларында 18 фатир булачак.

Кыскасы, 2016 елда Әгерҗе районын менә шундый зур төзелешләр, капиталь төзекләндерү эшләре көтә. Әгерҗедә генә дә 26 йортта төрле дәрәҗәдәге төзекләндерү эшләре башкарылачак.

Мин шунысын ышандырып әйтә алам, һәр кеше районыбызның социаль-икътисади үсеше өчен үзеннән өлеш кертеп намус белән эшләсә, дус-тату булса, без теләсә нинди авырлыкларны җиңәргә сәләтле.