Әгерҗе хәбәрләре

Әгерҗе районы

18+
Рус Тат
2024 - год Семьи
Район тормышы

Икмәк язмышы синең кулда, игенче!

Узган атнада районыбыз игенчеләре өчен җитди сынау - урып-җыю чоры башланды. Быел агрофирма хезмәтчәннәре алдында 21500 гектар мәйданнан бөртеклеләрне җыеп алу бурычы тора. "Көчек" һәм "Кырынды" бүлекчәләрендә - бүген эшнең кызган чагы. "Безнең алда торган иң беренче бурыч - уңышны көзен чәчеп калдырылган 2 меңнән артык гектар мәйданнан югалтуларсыз җыеп...

Узган атнада районыбыз игенчеләре өчен җитди сынау - урып-җыю чоры башланды. Быел агрофирма хезмәтчәннәре алдында 21500 гектар мәйданнан бөртеклеләрне җыеп алу бурычы тора. "Көчек" һәм "Кырынды" бүлекчәләрендә - бүген эшнең кызган чагы.
"Безнең алда торган иң беренче бурыч - уңышны көзен чәчеп калдырылган 2 меңнән артык гектар мәйданнан югалтуларсыз җыеп алу. Узган атнада арышка төштек. Чиратта - 250 гектарга якын мәйданда тритикале һәм 900 гектар кышкы бодай", - ди филиалның баш агрономы Фәнгиз Шакиров. Арышның уртача уңышы 27,5 центнер тәшкил итә. Бодайныкы - 23, ә тритикале 30 центнер тирәсе булыр дип планлаштыралар. "Бөтен өмет шушы көзге культураларда инде. Сабан культуралары бик кыска да, уңышы да мактанырлык түгел", - ди филиал идарәчесе Ильяс Кәрәмиев.
Без барган чәршәмбе көнгә арыш басуларыннан 13 комбайнчы 800 гектардан артык мәйданда 2250 тоннадан артык ашлык суктырган иде инде. "Нью Холланд" комбайннарында иң күп ашлык суктыручылар - Яңавылдан Илдус Гыйльмегаянов (174 тонна) һәм шул ук авылдан Илһам Кәрәмиев (166 тонна). Көчектән Руслан Пархунов, Көчектән Минрахман Гатауллин да алардан азга гына калыша. Яңавылдан Фәнил Садыйков үзебезнең "Акрос" комбайнында эшләп тә хезмәттәшләренең "эзенә басып килә". "Яңгырлар гына яумасын. Без көнне төнгә ялгап эшләргә әзер. Мондый уңышның бөртеген дә югалтырга ярамый", - диләр комбайнчылар. "Елына карата - бик яхшы уңыш инде бу. 2010 елгы корылык вакытында мондый уңыш турында хыяллана да алмый идек. Быелгы һава шартлары да шул елныкыннан әллә ни аерылмады бит", - дип кушыла Көчектән тәҗрибәле комбайнчы Радик Әхмәтов. Әйе, үзләре алдында иген уңышын югалтуларсыз җыеп алу кебек җитди бурыч торганлыгын аларның һәркайсы яхшы аңлый бүген. Шуңа хезмәткә карашлары да - чын хуҗаларча. Һәрчак бер-берсе белән киңәшләшеп, ярдәм итеп эшлиләр. Җитәкчеләр дә алар яныннан китеп тормый, проблема килеп чыга икән, шунда ук чишү юлын эзлиләр.
Комбайнчылар - иртәнге сәгатьләрдән караңгы төшкәнчегә кадәр басуда. Вак-төяк ремонт эшләрен V филиалның Ирек Фәйзуллин җитәкчелендәге ремонт бригадасы башкара. "Әлегә җитди ремонт таләп ителгәне юк. Яңгыр яуган көннәрне барабан асты гына еш тыгыла. Шунда ук туктап чистартабыз, чөнки һава торышы яхшы һәм икмәк яхшы төшкәндә һич кенә дә ватылып вакытны әрәм итәсе килми", - диләр комбайнчылар. "Быелгы комбайнчылар парадында агрофирма җитәкчелеге "комбайннан бер генә бөртек ашлык та коелырга тиеш түгел!" дигәнне һәрчак күз уңында тотып эшләүне көн таләбе итеп куйды. Шуңа басуда да комбайннарның герметизациясен даими тикшереп торабыз", - ди Фәнгиз Шакиров.
Ягулык белән дә проблема юк. Машиналар солярканы басуга ук алып киләләр. Көнгә ике тапкыр кайнар ашауны да басуга ике тапкыр китерәләр. Ашлыкны тагылмалы "КамАЗ" машиналары Әгерҗегә икмәк кабул итү пунктына, амбарларга алып китеп торалар. "Орлыкка дигән 250 тоннадан артык арышны Көчек, 300 тоннадан артыгын Кичкетаң амбарына салыт куйдык инде", - ди баш агроном. Саламны әрәм-шәрәм итүгә дә юл куелмый - аны кысып, мегафермага, Варкләд-Бодья, Тукай, Кырынды фермаларына ташыйлар. Әлеге бүлекчәләрдә терлек азыгы хәзерләү дә кызу темплар белән алып барыла. "Әнә, кукуруз ничек куе булып үсеп килә. Яңгырлар мул булган очракта кукурузның да уңышы яхшы булачак", - ди Фәнгиз Шакиров янәшәдәге басуга күрсәтеп.
Менә шулай, соңгы көннәрдә ешаеп киткән яңгырлар игенчеләрнең кәефен бераз кырса да, сыйфатлы һәм тиешле күләмдә терлек азыгы хәзерләү кирәклеген дә онытырга кирәкми. ТР Президенты Рөстәм Миңнеханов та авыл хезмәтчәннәре алдына: "Иң мөһиме - сыйфатлы урып-җыю һәм терлек азыгы хәзерләү", - дигән бурычларны куйды бит аларның икесенең дә бердәм дәрәҗәдә мөһим булуына ишарәләп.
Дания АБЗАЛИЕВА.

Следите за самым важным и интересным в Telegram-каналеТатмедиа

Районыбызга кагылышлы яңалыклар белән безнең  Telegram-каналдан танышыгыз


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев