Сабан туе килде туган якка

Кадерле райондашлар, милли бәйрәмебезгә туган якларга кайткан хөрмәтле кунаклар! Сезне халкыбызның иң яраткан, көтеп алган бәйрәме – Сабан туе белән ихластан котлыйм.

Сабантуй – кырда алны-ялны белми эшләгән, мул уңышка нигез салган авыл хезмәтчәннәренә дан җырлаучы, туган ягын җирсеп кайтучыларга дус-туганнары белән очрашу мөмкинлеге бирүче, районыбызда дус яшәүче төрле милләт халкының бердәмлеген чагылдыручы бәйрәм ул. 

Безнең районда Сабан туе һәрвакыт җыр-биюле, милли ризыклы, уен-көлкеле уза. Мәйданда олысы-кечесенә урын түрдән бирелә. Шуңа күрә бәйрәмдә катнашучыларга күңел күтәренкелеге, шатлык-сөенечләр, матур яллар телим. Милли бәйрәмебез хезмәттә яңа уңышларга этәргеч булсын, яшәүгә дәрт уятсын.