Безнекеләр дә сынатмады

"Спутник" Боз сараенда тимераякта фигуралы шуу буенча балалар-яшүсмерләр спорт мәктәбенең ачык беренчелегенә ярышлар узды. Ярышка Алабуга, Чаллы, Мамадыш, Казаннан яшь спортчылар килгән иде. Ә балалар-яшүсмерләр клубы данын Гүзәл Хуҗәхмәтова, Евгения Лошанкова, Марина Шаһиәхмәтова яклады. Аларның өчесе дә призлы урыннарга лаек булды. Гүзәл Хуҗәхмәтова икенче спорт разряды буенча I урын, Марина Шаһиәхмәтова икенче яшүсмерләр разрядында II урын, Евгения Лошанкова шушы ук разрядта III урын алды. Аларны ярышларга тренерлары Александр Карнизов әзерләде.