Алия – чемпион

1нче гимназиянең 1 сыйныф укучысы Алия ГӨЛДАНАЕВА үзенә һәм газиз әнисенә 8 Март бәйрәме алдыннан зур бүләк ясады.
Балалар бакчасына йөргәндә үк Алиянең шахматка сәләтен күреп алган тренеры Әюп Хәкимов аның белән тагын да ныграк шөгыльләнә башлый. Секциядә иптәшләре белән ярыша-ярыша шахмат уйнавы, өйдә дә якыннарына тынгылык бирмәве кызга район бәйгеләрендә җиңү алып килә. Узган ел Татарстан беренчелегенә узган бәйгене тамаша кылырга барган Алия дә яшьтәшләренең ничек оста итеп шахмат уйнауларын күзәтеп кайта һәм үзенә тагын да ныграк әзерләнергә кирәк дигән максат куя. Быел республика күләмендәге әлеге зур ярышта Алиягә дә катнашу бәхете елмая һәм ул авыл районнары арасында беренчелекне яулый. Ә бөтен республика буенча ул дүртенче урынга лаек була. Котлыйбыз!
Шулай ук әлеге бәйгедә Алиянең яшьтәшләре Шамил Фәтхетдинов, Ярослав Федоров та 64 катнашучы арасында уңышлы чыгыш ясыйлар.
- Шәкертләрем беренче тапкыр шундый зур бәйгедә катнаштылар һәм сынатмадылар. Мин алар белән чын күңелдән горурланам, - ди тренер Әюп Хәкимов нәни балаларга уңышлар теләп.