Әгерҗе командасы – беренче

Каты куллы яшүсмерләребез узган атнада Казанда Татарстан беренчелегенә узган бәйгедә унбер медаль яуладылар. Ә командалар арасында әгерҗелеләрнең беренчелеккә чыгуы аеруча сөенечле булды. Бу - армспорт белән шөгыльләнүчеләрнең тәүге тапкыр зур җиңүләре.
- Бәйге бик киеренке булды. Көндәшләр дә көчлеләр иде. Әмма шәкертләрем сынатмадылар, - ди тренерлары Сирень Галиуллин.
Балалар-яшүсмерләр спорт мәктәбеннән Денис Әнвәров, Ринат Насыйров, Раил Кәрәмиев, Ләйсән Гобәева, Ләйсән Сабитова, Кадыбаштан Гөлшат Дөлкәрнәева пьедесталның иң югары баскычына күтәрелделәр. Икенче урыннарның күпчелеген Тирсә укучылары алдылар. Менә алар: Әлмирә Хәбибуллина, Рафис Мифтахов, Әлмир Әхмәтшин. Спорт мәктәбеннән Алмаз Садыйков та - көмеш медаль иясе. Ә Тирсәдән Илнар Ваһапов өченче урынга чыкты.
Бу бәйгегә барырга матди яктан ярдәм иткән "Агрохимсервис" җәмгыяте һәм "Сарсак-Омга" ширкәте җитәкчеләре Адил Латыйпов һәм Разиф Харисовка тренер, укучылар зур рәхмәтләрен җиткерәләр.
Призлы урын яулаган спортчыларыбызны декабрь аенда Түбән Новгородта Идел буе Федераль округы беренчелегенә узачак кул көрәше көтә.