Яшьләргә – яшел урам

Реклама

Узган якшәмбе Әгерҗедәге Имәнлек ял итү зонасы чаңгычылар һәм җанатарларның шат авазларыннан яңгырап торды. Бирегә 400ләп чаңгычы килгән иде. Ә район буенча быел чаңгы юлларына 1000нән артык спорт сөюче чыкты. Шунысы сөенечле, районыбызда сәламәт яшәү рәвешен сайлап, спортка тартылучылар саны елдан-ел арта. Быел - Универсиада елында "Россия чаңгы юллары" традицион ярышында катнашучылар аеруча күп иде.
Әнә, Пенсия фонды идарәсе кызлары җитәкчеләре Зөлфия Бакасова белән бердәм булып чаңгы юлларына чыкканнар. Хәрби комиссариат хезмәткәрләренең дә кәефләре күтәренке. "Без - һәрвакыт сугышчан әзерлектә. Хезмәтебез шуны таләп итә", - дип рухландыра аларны бүлек начальнигы Илгиз Галиев.
Ниһаять, ярышларда катнашучылар сафларга тезелеп, әзерлекләрен белдерделәр. Аларны район башлыгы урынбасары Ришат Нурисламов, башкарма комитет җитәкчесе урынбасары Римма Гыйльметдинова сәламләделәр. Спорт һәм туризм бүлеге начальнигы Илшат Гайнетдинов быелгы ярышларның үзенчәлеген исләренә төшереп үтте: "Безнең стартлар быел Казанда узачак җәйге Универсиадага багышлана. Бик тиздән планетаның пульсы Казанга күчәчәк. Без ышанабыз: Россия спортчылары иң күп медаль яулаучылар рәтендә булачаклар. Бүген өлкәннәр - 2014, укучылар 2013 метрлы дистанциядә көч сынашачак. Бу саннарның нәрсә аңлатканын барыгыз да беләсез инде: 2014 - Сочида узачак Олимпиада елы, ә 2014 - Казандагы Универсиада елы", - дип чаңгычыларга уңышлар теләде ул.
Иң беренче стартка ир-егетләр басты. Яшьләр белән рәттән мөхтәрәм ветераннарыбыз Маннур Исхаков, Фоат Кавиев, Анатолий Вахрушев, Ермолай Кальтымов һәм Татьяна Мухачеваны күреп, шатланып куйдык. "Чаңгыда йөрү - адреналин кебек ул безгә", - диләр алар. Кышын чаңгыда чыкмаган көннәре дә юк икән. Анатолий Вахрушев белән Татьяна Мухачева тиздән Казанда узачак пенсионерларның чаңгы ярышында да катнашачаклар әле.
Ярышлар быел аеруча мавыктыргыч булды, чөнки күбесе көчле чаңгычылар иде. Ир-егетләр арасында 1нче гимназиядән укытучы Владимир Екимовка тиңнәр булмады. II-III урыннарны "Әгерҗе нефть продуктлары" җәмгыяте филиалыннан Семен Овчинников һәм мәгариф бүлегеннән Алексей Колчин бүлештеләр.
Гүзәл затлар да сынатмады. Шәхси эшмәкәр Лариса Еманова финиш сызыгына иң беренче булып килеп җитте. Кече Пургадан Галина Ершева һәм Нина Аверьянова - II-III урыннарда.
Укучылар арасында шәп чаңгычылар үсеп килүе аеруча сөенечле. 2нче мәктәптән - 100, 1нче гимназиядән 60ка якын укучы бу көнне бәйгедә катнашты. Шулай да ярышта иң көчле мари чаңгычыларының булмавы үзен сиздерде, әлбәттә. Сер түгел, алар булса, бөтен призлы урыннар мариларда булыр иде, мөгаен. Быел исә, беренче тапкыр гына катнашсалар да, Азево укучылары рекорд куйды. Әлеге мәктәптән Владимир Колбин, Дима Орехов, Станислав Маргасов I урыннарны яуладылар. "Алар белән танылган тренер Владимир Семенов шөгыльләнә башлады. Нәтиҗәсе дә күз алдыгызда", диде горурланып Азево җирлеге башлыгы Анатолий Никитин.
Укучы кызлар арасында Варкләд-Бодьядан 4 сыйныф укучысы Ульяна Михайловага тиңнәр булмады. Ярышка соңга калу сәбәпле, аңа өлкән сыйныф кызлары белән бергә йөгерергә туры килде. Әмма Ульяна сынатмады, хәтта өлкәнрәк кызларның "борынына чиртте". Финишта аны бабасы белән әбисе кочаклап каршы алды. "Оныгыбызны зур ярышларга алып киләсебез килде. Чаңгы спортын бик ярата. Башкаларны да күрсен дидек. Беренче тапкыр катнашып, район ярышында рекорд куюына шатланып туялмыйбыз", - ди мәгариф ветераны Евдокия Игнатьева. Ә югары сыйныфлар арасында беренчелек 2нче мәктәп кызлары Ася Гаримова һәм Карина Хәбибуллина кулында булды.
Чаңгы ярышлары әле дәвам итәчәк. Бу шимбәдә Бима авылында "Мари лыжня-2012", ә март аенда яраткан газетагыз "Әгерҗе хәбәрләре" газетасы призына чаңгы ярышлары узачак.