Универсиада уты Әгерҗегә килә

27нче Бөтендөнья җәйге Универсиада уты эстафетасы 23 июньдә безнең районга да килеп җитә. Факелны Минзәлә районыннан Чулман елгасы аша Красный борга алып киләләр.
Тиздән Казанда узачак Универсиада уты эстафетасы 2012 елның 15 июлендә башланган иде. Ут Җир шары тирәли сәяхәт итеп быелның 25 январенда Владивостокка килеп җитте. Эстафетаның Россия буйлап маршруты 150 мең километрны тәшкил итә.
20 июньнән башлап Универсиада уты Татарстанның барлык 43 районында да булып чыгачак. 23 июльдә эстафетаны Әгерҗе районы кабул итеп алырга әзерләнә. Район тарихында беренче тапкыр Универсиада уты безнең Әгерҗе аша уза һәм бу истәлекле чара ничек оештырылачак? Шул турыда сөйләвен үтенеп, без спорт һәм туризм бүлеге начальнигы Илшат ГАЙНЕТДИНОВка мөрәҗәгать иттек.
- Универсиада утын без Красный борда каршы алачакбыз. Биредә кыска гына митинг уздыргач, транспорт белән утны Әгерҗегә алып киләчәкләр.
Сәгать 10да "Спутник" Боз сарае каршында Универсиада утын каршы алуга багышланган тантана булачак. Аннан 27 райондашыбыз стадионга кадәр эстафетаны әлеге факел белән узачак. Эстафетада катнашучылар бу көнне зарыгып, дулкынланып көтәләр. Алар арасында район җитәкчеләре, танылган спорт ветераннары Маннур Исхаков, Сирень Галиуллин, Татьяна Мухачева, "2012 елның иң яхшы спортчысы" исеменә лаек булган 4нче шәһәр мәктәбе укучысы Андрей Биянов, "Спутник" футбол командасы капитаны Илшат Хәкимов, бокс һәм чаңгы җәмәгать федерацияләре президентлары Илдус Шәймөхәммәтов, Равил Бадахшин һәм республика, Россия, Европа, Дөнья чемпионатларында катнашкан спортчыларыбыз бар. Эстафетаны 6нчы балалар бакчасы физик тәрбия укытучысы.... төгәлләячәк.
Ул көнне стадионда ветераннар һәм яшьләр арасында футбол ярышы була. Универсида уты факелы стадионга килеп җиткәч, матч вакытлыча тукталыла һәм биредә дә тантаналы чара үтәчәк.
Эстафета шәһәребезнең К.Маркс урамы буйлап уза. Унынчы яртыдан сәгать унберләргә кадәр бу урамда транспорт хәрәкәте тукталылачак. Шуңа күрә бу вакыт аралыгында машина белән юлга чыкмаска тырышыгыз яки башка маршрут сайлагыз.
23 июль көнне райондашларыбызны Универсиада уты эстафетасына багышланган чараларда катнашырга чакырабыз. Бездән соң эстафета Менделеев районында дәвам итәчәк.
Рәмзия ЗАРИПОВА.