Фирдүс Тямаев авариягә очрый язган

Фирдүс Тямаев командасындагы егетләр белән Мәскәүгә киткән. Социаль челтәрдәге сторисында ул «Өч ахмак Мәскәүгә китте», – дип, көлкеле видеолар да урнаштырган. 

Тик трассада алар белән күңелсез хәл килеп чыккан. «Бүген юлда куркыныч ситуациядә калдык. Исән-сау йөрегез юлларда», – дип язган җырчы һәм һәлакәткә китерә язган хәлнең видеосын куйган.

Үз полосаларыннан барганда, аларның машиналарын фура кыса. Рульдә ул вакытта Фирдүс Тямаев үзе булган. Ул алга үтеп, юл кырыена чыгып туктый. Каршыларына һәлакәт китереп чыгара язган фура да туктала. 

«Андый вакытта тәҗрибәле йөртүче генә аңлап җитешә ала. Брат, син молодец, ситуациядән чыгардың», – ди Фирдүснең юлдашы Булат. Җырчының гитаристы Инсаф арткы урындыкларда барган. 

«Аллага шөкер. Инсаф тәгәрәп кенә йөрде, аңламыйча да калды. Исән-сау йөрегез юлларда. Карап йөрегез, сак йөрегез. Рульдә булганда башка нәрсәгә игътибар бирмәгез», – ди Фирдүс Тямаев.

Чыганак: Интертат