Ләйсән Гыймаева һәм Булат Бәйрәмов котлаулар кабул итә

Иҗади гаилә өчен бүген бәйрәм көне – Ләйсән беләт Булатның кавышып яши башлауларына 20 ел тулган!

Шушы уңайдан алар социаль челтәрдәге сәхифәләрендә 2 дистә ел элекке туй фотолары белән уртаклашканнар, бүгенге гаилә фотоларын да куйганнар.

«Бүген – безнең туй көнебез. 20 ел бергә. Фарфор туй. Котлаулар кабул итәбез.

Бик үзгәргәнбезме соң? Туй күлмәге киеп, әле кичә генә басып торган кебек... Ә күпме гомер үтелгән. Алда тагын бик күп бәхетле еллар көтсен безне. Балаларны тигезлектә үстереп, оныкларны күрергә, 85не тутырып, елмаеп-көлеп яшәргә язсын», – дигәннәр фотолар астында Ләйсән – Булат.

Әлеге күркәм гаиләне котлап, бик күп комментарийлар килеп ирешкән. «Котлыйбыз. Хәерле, бәрәкәтле гомерләр сезгә», «Бик матур гаилә. Кызларыгыз да өчесе өч төрле матур, сөйкемле. Яратам сезне», «Үрнәк гаилә. Сокланам», «Ләйсән, туй күлмәгең әле дә ярыйдыр... Күзләр тимәсен үзегезгә!», «Еллар үткәч, тагын да матурлангансыз. Саклагыз бер-берегезне», – дип язучылар булган.

Булатның туйда кигән костюмы аерым игътибарны җәлеп иткән. «Костюмым әллә 3 үлчәмгә зур булган инде», – дип көлгән Булат үзе дә. Аңа җавап итеп, аның иҗатташ дусты җырчы, алып баручы Зөлфәт Зиннуров: «На вырост, брат! Ул вакытта шулай тиеш иде инде», – дигән.

Ләйсән белән Булатны котлап, барлык җылы теләкләргә кушылабыз.

Чыганак: Интертат