"Нигә язмыш шундый кырыс?": Вәсилә Фәттаховасыз биш ел...
Зур югалту
Татарстанның һәм Башкортстанның атказанган артисты Вәсилә Фәттахованың арабыздан китүенә бүген биш ел. Вәсиләнең вакытсыз китүе әле дә йөрәкне әрнетеп тора. Гаиләсе өчен генә түгел, татар һәм башкорт халкы өчен зур югалту.
Вәсилә Фәттахова 2016 елның 26 гыйнварында 36 яшендә, бала тапканнан соң өзлегүдән вафат булды. Җырчының Кәрим һәм Камилә исемле балалары тормыш иптәше Илгиз Гәбдерәкыйпов тәрбиясендә үсә. Бүген Илгиз “5 ел әнисез” дип Вәсиләне искә алды.
Вәсиләне югалткач, Башкортстанның халык артисты Әнвәр Нургалиев мәрхүмә турында болай дигән иде: “Вәсилә белән 1997-1998 елларда ул институтка укырга керергә килгәч, Уфада таныштык. Таһир Нуриевич белән Айдар Галимов чибәр, матур тавышлы бэк-вокалист кирәк дип мөрәҗәгать иткәч, Вәсиләне тәкъдим иттем. Вәсиләгә бик җылы хисләр кичерәм. "Нигә язмыш шундый кырыс?" дигән сорау әле дә күңелемә тынычлык бирми. Үзенчәлекле тавышы белән Вәсилә беренче җыры белән үк тыңлаучыны үзенә гашыйк итә алды. Ул миңа авыр вакытларда терәк һәм киңәшче булды".
Вәсиләнең кабатланмас моңлы тавышы, ихлас йөзе һәрвакыт безнең күңелләрдә сакланачак. Урыны оҗмах түрләрендә булсын...
Районыбызга кагылышлы яңалыклар белән безнең Telegram-каналдан танышыгыз
Иң мөһим һәм кызыклы язмаларны Татмедиа Telegram-каналында укыгыз
