Алар ярдәмгә килергә әзер

Шушы җан тетрәткеч күренеш үзе генә дә бу авыл тирәсендә тагын бер янгын сүндерү бүлекчәсе булырга тиешлеген искәртте сыман. Ә андый оешма инде бүген бар, шөкер. Янгынга юлыккан көнне Кичкетаң авыл җирлегенә ирекле янгын сүндерү сагы (ДПО) ачылу тантанасына юл тотуыбыз иде.
Тантанада район башлыгы Фәрит Габбасов, Россия ирекле янгын сүндерү сагының Татарстан региональ бүлеге начальнигы Алик Нәҗметдинов, ВДПОның Яр Чаллы филиалы җитәкчесе Шамил Шәйхразиев катнашты.
"Мондый ирекле янгын сүндерү сагы бик тә кирәк биредә. Тирсәдә, Исәнбайда янгын сүндерү бүлекләре бар. Ә менә Кичкетаң җирлеге Әгерҗе һәм райондагы янгын сүндерү бүлекләреннән ерак урнашкан. Шуңа күрә биредә мондый ирекле янгын сүндерү сагы булдыру - тормыш таләбе. ДПОны оештыруда авыл җирлеге башлыгы Зөлфәт Нуриевның тырышлыгы бик зур булды. Эшен төрле яклап башкаларга үрнәк итеп куярдай Зөлфәт Равилевич бу юлы да иң беренче булып шушы хезмәтне оештыруы белән олы ихтирамга лаек. Моңа кадәр дә янгыннар чыккан чакта ярдәмгә ашыга иде авыл башлыгы, җирлектәге техника да ничә тапкырлар ярдәмгә чыкты микән?! Инде ДПО оешкач, штаттагы хезмәткәрләр янгын сүндерүгә ирекле янгынчылар буларак чыгачаклар. ДПОны оештыруда Әгерҗе янгын бүлеге, Яр Чаллы филиалы, Татарстан региональ бүлегенең дә ярдәме зур булды. Аның төп бурычы - халык арасында профилатик эш алып бару. Тормыш булгач, янгыннарга да чыгарга туры килми калмас. Инде мондый вакытларда сездән тиз арада әзерлек һәм һөнәри осталык таләп ителә. Ни кызганыч, янгын сүндерүчеләр ничек кенә тиз килеп җитмәсен, ут үз зыянын салырга өлгерә шул. Әнә, Рус Шаршадасында моның ачык мисалын күрдек бүген", - диде Фәрит
Кичкетаңның ирекле янгын сүндерү сагы авыл җирлегенең элеккеге гаражында урнашкан. Гаражны янгын сүндерүчеләргә тиешле хезмәт шартлары булырлык итеп җиһазландырганнар. Биредә җылы, чиста. Штаттагы 6 кеше тәүлек буе чиратлашып кизү торачак. Янгын сүндерүчеләрнең һәркайсы махсус курсларда укып кайткан, көтелмәгән хәлләрдән страховкаланган. ДПОның ике автоцистернасы, ике цистерна, тракторы бар. Телефоны - 38290. "Тагын бер янгын сүндерү машинасы белән тәэмин итү турында уйлашырга кирәк", - дигән фикерен җиткерде Фәрит Габбасов.
Россиядә ирекле янгын сүндерүчеләр инде революциягә кадәрле үк булган. Тик вакыт узу белән алар юкка чыккан. Ирекле янгын сүндерү сагының кирәклеген аңлап, узган елның маенда "Ирекле янгын сагы" турында федераль закон кабул ителде. Шуның үрнәгендә августта Татарстанда да "Ирекле янгын сагы булдыру" турындагы Закон үз көченә керде. Бүгенге көндә Татарстанда 600дән артык ДПО бар. Ә менә безнең районда Кичкетаң ДПОсы - әлегә беренче карлыгач.
"Бүген без бергәләп халык өчен бик тә кирәкле эш башкарабыз. Якын-тирәдәге авылларга хезмәт күрсәтү дә сезнең җаваплылыкта булачак. Мин ышанам: сез сынатмассыз", - диде Алик Нәҗметдинов. Якын киләчәктә шундый ук ДПОны Кадрәк авыл җирлегендә дә булдыру планлаштырыла. "Бу эшне тизләтергә кирәк. Чөнки бу җирлек тә янгын сүндерү бүлекләреннән ерак урнашкан", - дигән фикер яңгырады чарада.
Кичкетаң ДПОсын ачканда, янгын сүндерүчеләр исеменә "җиңсәләрегез һәрвакыт коры булсын" дигән теләк тә җиткерелгән иде. Тик янгын сүндерүчеләргә шул төнне үк җиңсәләрен чылатырга туры килде. Кичкетаңда төнлә бер шәхси йортта янгын чыгып, шунда ярдәмгә ашыктылар алар. "Тирсәдән дә бер янгын сүндерү машинасы килде. Безнең егетләребез дә сынатмадылар", - ди Зөлфәт Равилевич.
Менә шулай, бер тәүлек эчендә булган ике янгын мондый янгын сүндерү сагын булдыруның никадәр мөһим эш икәнлеген кат-кат раслады. Инде ирекле янгын сүндерүчеләргә теләк бер: ут үз иминлегегезгә, сәламәтлегегезгә зыян салмасын, берүк.
Дания АБЗАЛИЕВА.