Бүген һава температурасы 30 градуска кадәр күтәрелә

Татарстан Гидрометеорология һәм әйләнә-тирә мохитне күзәтү идарәсе мәгълүматларына караганда, бүген - 4 июльдә, аязучан болытлы һава торышы хакимлек итәчәк.

Синоптиклар бүген явым-төшем көтелмәвен җиткерә. Төньяк-көнчыгыш тарафтан талгын җил исә.

Көндезге һава температурасы 25-30 градус җылы булачак.

5 июльгә каршы төндә урыны белән яңгыр яву ихтималы бар. Һава температурасы 13 градус җылы булыр дип фараз кылына.

Ә гомумән алганда, бу атнада җылы һава торышы сакланачак. Ял көннәренә һава температурасы тагын да күтәрелеп, 32 градуска кадәр кызу булыр дип фаразлана.