Суд карарын үтәмәсәң

Шартлы рәвештә хөкем ителгәннәр яңадан җинаять юлына басмасын өчен җинаятьләрне үтәтү инспекциясе полиция хезмәткәрләре белән берлектә 16-26 мартта "Условник" операциясе үткәрде. Рейд барышында шартлы рәвештә хөкем ителгәннәрнең җәмәгать һәм яшәү урыннарында үз-үзләрен тотышларын, суд куйган бурычны, ягъни кичке сәгать 10нан иртәнге 6га кадәр өйдә булырга тиешлеге турындагы карарны ничек үтәүләрен тикшерделәр. "Условник" операциясе барышында әлеге таләпләрне үтәмәүче ике кешегә карата хөкем карарын үзгәртүне сорап, судка мөрәҗәгать иттеләр. Аларга карата суд тагын да катырак хөкем карары чыгарачак.