Әгерҗе балалары кайда ял итәр?

Болар - һәр ата-ананы борчый торган сораулар. Республика һәм Әгерҗе районы җитәкчелеге дә балалар ялын оештыру мәсьләләре буенча эшне күптән башлады. Балаларның җәйге ялын оештыру белән шөгыльләнүче яшьләр сәясәте бүлеге начальнигы Татьяна Сергеевага "Әгерҗе районында балалар ялы ничек оештырылачак?" дигән сорау белән мөрәҗәгать иттек.

- Башка еллардагы кебек үк быел да районда 17 мәктәп яны, авыл мәктәпләре базасында 8 хезмәт һәм ял лагере, Красный борда "Алмалы", Яңавылда "Лабиринт" палаткалы лагерьлары эшләячәк. Гомумән, районыбыздагы җәйге лагерьларда 1144 баланы мавыктыргыч, файдалы ял көтә. Җәйге ялны оештыруга барлыгы 6 миллион 202231 сум акча каралган. Шуның 5 миллион 132700 сумы - республика казнасыннан. Ата-аналар эшли торган предприятие-оешмалардан 125039 сум керер, әти-әниләр взносы 944492 сум җыелыр дип фаразлап торабыз.

Моннан тыш, социаль яклау идарәсе 200 баланы сәламәтләндерү өчен республикабыз санаторийларына җибәрә. Ә 20 инвалид бала Татарстандагы тернәкләндерү үзәкләрендә сәламәтлеген ныгытачак.

Балаларның лагерьлардагы ялын оештыруның бер көне күпмегә төшәчәк соң?

"Алмалы"да бер балага бер көнгә - 700,50, палаткалы лагерьда - 829, мәктәп яны һәм хезмәт һәм ял лагеренда - 146,30 сум.

Ә баласының лагерьда ял итүе ата-ана кесәсенә күпмегә төшә?

"Алмалы"да - 2500,

"Алмалы"да спортчы балалар өчен профиль сменасы - 2200,

"Лабиринт"та - 1000,

Мәктәп яны лагеренда 460,85 сум.

"Алмалы"да балигъ булмаганнар комиссиясендә исәптә торучы яшүсмерләрнең ялы өчен ата-анадан взнос алынмаячак.

Күп кенә яшүсмерләребез җәйге каникулларда бераз булса да акча эшләп алу ягында. Менделеев мәшгульлек үзәгенең Әгерҗедәге филиалы 14-18 яшьлек 230 яшүсмерне вакытлыча эшкә урнаштырырга планлаштырып тора.

Җәйге каникулларда балаларыбыз рәхәтләнеп ял итеп, тагын да чыныгып, үсеп, файдалы эш белән шөгыльләнеп, вакытларын бушка уздырмаслар дип ышанабыз. Без исә моның өчен барысын да эшләргә әзер. Район башлыгы Валерий Макаров та балаларның җәйге ялын оештыру белән даими кызыксынып тора, лагерьларны ачуга әзерләүне ныклы контрольдә тота.