Әгерҗе гармунчыларына – Президент бүләге

- Бу олы бүләккә без, Россия халыклары милли инструментлары оркестлары һәм ансамбльләренең "Киңкырлы Россия" фестиваль-конкурсында катнашып, беренче дәрәҗә диплом алгач лаек булдык. Президент кулыннан мондый бүләк алу бик дулкынландырды да, бер тату гаилә кебек эшләүче ансамблебез белән горурлану хисләре дә уятты. Гомумән, нинди генә фестиваль-конкурсларда катнашсак та, бу бәйгеләр безне тагын да дәртләнебрәк иҗат итәргә, эзләнергә, яңа җиңүләргә этәрә. Безнең өчен иң мөһиме - тамашачы мәхәббәте һәм аларның көчле алкышлары, - ди Марат Муллахмәтов.

Иҗади бәйгеләргә килгәндә, ун еллык бай тарихы булган "Көмеш телле гармун" халык ансамбле катнашкан республика күләмендәге фестиваль-конкурсларны санап кына бетерү мөмкин түгел.

- Әтием Альбертның кулы җиңел булды. Ансамбльне 2005 елда иң беренче ул оештырып җибәргән иде бит. Баянда уйнау сәләте миңа да, апам Марсиләгә дә әтидән күчкән инде. Әтинең инициативасын авыл мәдәният йортларында эшләүче баянчы һәм гармунчы егетләр дә, халык уен коралларында уйнаучылар да күтәреп алды. Менә шуннан бирле ун ел инде без районыбыз һәм Татарстан буйлап кына түгел, Россия төбәкләре буйлап төрле бәйрәмнәрдә, фестивальләрдә бик теләп катнашабыз, - дип дәвам итә әңгәмәне Марат.

- Ел да Казанда уза торган "Уйнагыз, гармуннар!" республика фестиваленнән алып кайткан дипломнары гына да дистәгә якын инде аларның. "Түгәрәк уен" Бөтенроссия бәйрәмендә дә лауреат булдылар. Лаеш районындагы Никольское авылында "Каравон" рус фестивалендә, атаклы баянчы Кирам Сатиевның туган ягы Актанышта узган "Агыйдел гармуны" фестивалендә дә халык мәхәббәтен яулап кайттылар безнең гармунчылар, - дип горурланып сөйли үзәкләштерелгән мәдәният системасы директоры Эльвира Нәбиева.

2009 елда Халык ансамбле исемен алган коллективта хәзер Марат Муллахмәтов җитәкчелегендә Тирсәдән Альберт Муллахмәтов, Кырындыдан Баязит Ахунов, Көчектән Наил Таҗиев, Красный бордан Илсур Сабирҗанов, район Мәдәният сарае методисты Ләйсән Тимуршина иҗат итәләр. Бу сәхнә осталары - райондагы һәр бәйрәм-кичәнең иң матур бизәге. Гәрчә мин үзем гармунчы егетләребез кайчан чыгар инде дип түземсезләнеп көтәм. Алар чыгыш ясаганда зал тып-тын кала. Чөнки егетләр гармуннарын сузып җибәрү белән тамашачыны моң дәрьясына алып кереп китеп әсир итәләр, күңелләрнең иң нечкә кылларын тибрәтәләр. Күпме җырларыбызны, моңнарыбызны саклап калган, бүгенгә китереп җиткергән, киләчәккә дә алып барачак "Көмеш телле гармун" егетләренең газиз гармун, баян тавышларын әле озак еллар мөкиббән китеп тыңларга язсын әле.