“Әгерҗе хәбәрләре“ газетасы сайтында балалар Тукай шигырьләрен сөйли

Ай буе редакциянең электрон почтасына бер-бер артлы видеолар килеп торды. Барлыгы 50дән артык шигырь алдык. Без аларны чиратлап сайтка “элдек“. Шунысы сөендерә, бакча-мәктәпләрдә Тукай иҗатына зур игътибар бирелә. Милли киемнәр кигән балаларның шигырьләрне рольгә кереп бик оста башкарулары сокландырды. Бигрәк тә 1нче, 3нче балалар бакчалары коллективлары зур активлык күрсәтте. Алар үзләрендә тәрбияләнүче уннан артык баланың шигырь сөйләгәнен видеога төшереп безгә юлладылар.

Әлеге рубрика малайлар-кызларны гына түгел, өлкән укучыларыбызны да  кызыксындырды. Уразайдан актив хәбәрчебез Раилә Бариева, үзәк китапханәдән Рушания Байтимерова, Тирсәдән татар теле укытучысы Раушания Низамбиева да шигырь сөйләү осталыкларын күрсәттеләр.

Тукай иҗатын, аның шигырьләрен яратканыгыз өчен бик зур рәхмәт! Әлеге рубрикада катнашучыларны редакциянең Рәхмәт хатлары белән бүләклибез. Аларны алу өчен Май бәйрәмнәреннән соң редакциягә килүегезне сорыйбыз.