Әгерҗе яшеллеккә күмелерме?

Җомга көн районда әлеге изге эшкә кушылырга теләк белдерүчеләр күп булды. Агач утырту өчен көне дә бик килеште, яңгырдан соң салкынча һава торышы үсентеләргә үсеп китү өчен бик кулай, диләр белгечләр. Яшеллек сагында торучы урманчылар бу эшкә иртәдән үк керештеләр. Әгерҗе, Красный бор, Шаршады, Девәтернә урманчылыкларына Кадыбаш, Көчек, Азево, Шаршады мәктәпләре укучылары да кушылды. Коррекцион мәктәп-интернат белән "Наз" приютында тәрбияләнүчеләр дә, кулларына көрәк һәм чиләкләр тотып, агач үсентеләре утыртырга чыктылар. Район хакимияте хезмәткәрләре, депутатлар да, кыскасы, түрәләрдән алып балаларга кадәр бу изге эшкә үз өлешләрен кертеп калырга ашыктылар бу көнне. Боз сарае, Сәхиповларның "Илдан" базасы, үзәк хастаханә, 4нче мәктәп, мәгариф идарәсе, газ хезмәтте территорияләрендә Әгерҗе урманчылыгында үстерелгән 115 чыршы һәм нарат үсентеләре шаулап үссен дигән теләктә калабыз. Халык бик күп йөри торган Җиңү скверында һәм "Яшьлек" паркында да корыган агачларны яшь үсентеләр алыштыруына ничек сөенмисең инде?!

- Агачны утырттың да эш бетте дигән сүз түгел бит әле. Аларны үстерү өчен дә күп көч куярга кирәк. Мәгариф идарәсе хезмәткәрләре, 4нче мәктәп коллективы үзебезнең территориядәге яшеллекне саклау өчен күп тырышлык куябыз. Менә бу яшь агачларны да тәрбияләп торырга сүз бирәбез, - ди мәгариф идарәсе методисты Ләйсән Кәлимуллина. Сүз уңаеннан: бу көннәрдә 4нче мәктәп территориясендәге хуш истән башлар әйләнә. Алмагач, шомырт шау чәчәктә. Нинди матурлык һәм гүзәллек биредә!

Әмма тәрбия җитмәү аркасында яшь үсентеләрнең үсеп китә алмавы урманчыларның да баш бәласенә әйләнгән.

- Шәһәр урамнарын яшелләндерү максатыннан ел саен йөзләгән агач һәм куак утыртабыз. Әмма шул агачларның шаулап үскәне бармак белән генә санарлык. Утыртабыз да онытабыз шул без аларны. Аннан кыш көне юлларда кар чистартканда техника юл читендәгне агачларның күбесен юк итә. Менә шул үсентеләрне бүлеп аласы иде. Әнә, 3нче мәктәп территориясенә күз салыгыз әле. Һәр агач турында кайгырталар биредә. Алмагачлары хәзер шау чәчәктә, туяларның ботакларын матур итеп кискәннәр. Без, урманчылар, районыбызны һәм шәһәрне яшеллеккә күмелгән итеп күрәсе килә. Норлат, Зәй, Мамадыш, Менделеев шәһәрләреннән үрнәк алырга кирәк безгә, - ди урман мастеры Татьяна Егорова.

Санитар икеайлык барышында шәһәрдә һәм авылларда әле агачлар утырту дәвам итәчәк. Шәһәрдә үзара салым акчасына бик күп карт тирәкләр киселгән иде. Менә хәзер алар урынына утыртылган яшь үсентеләрнең шаулап үсүен телибез.

Екатерина САМСОНОВА.