Әгерҗелеләр турында яңа китап дөнья күрде

Актаныш төбәгеннән чыккан танылган журналист Әлфия Самат соңгы елларда Татарстан районнарында язмышын авыл белән бәйләп, авыр, әмма ил табынын баету өчен бик тә кирәкле хезмәтеннән тәм табып эшләүче алдынгылар, гаилә фермалары, гомерләрен авылга багышлаган җитәкчеләр турында шактый саллы, затлы китаплар нәшер итә.

Каләм остасының тагын бер яңа китабы дөнья күрде. Ул татар һәм рус телләрендә нәшер ителгән "Иң көчлеләр" (Сильнейшие) дип атала. Бу китапта Әгерҗе районы башлыгы Валерий Макаров, "Агрофирма-Әгерҗе "ширкәте директоры Ленар Нургаянов һәм "Агрохимсервис" җитәкчесе Адил Латыйпов һәм алар җитәкләгән коллектив хезмәтчәннәре турында язмалар һәм фотолар урын алган.