Әгерҗелеләр Зур этнографик диктант яздылар

Быелгы чарада 60ка якын кеше катнашты. Алар арасында мәдәният хезмәткәрләре, мөгаллимнәр, китапханәчеләр, журналистлар бар иде. Кемдер белемен тикшереп карау өчен килгән.

• Сораулар җиңелдән түгел. Кемгәдер диктант язу өчен махсус әзерлек тә кирәк булгандыр, – ди мәдәният бүлеге җитәкчесе Марс Гатауллин. – Чарада катнашырга теләк белдерүчеләргә зур рәхмәт.

Этнографик  диктантның Халыклар бердәмлеге көне алдыннан  оештырылуы юкка гына түгел. Безнең район өчен аның әһәмияте аеруча зур, чөнки бездә гомер-гомергә татарлар, руслар, марилар, удумуртлар һәм башка милләт вәкилләре дус-тату гомер кичерә.

Диктант язучылар арасында чарада әле беренче тапкыр гына катнашучылар да бар иде. Әйтик, Рушания Байтимерова.

• Минем өчен бу аеруча кызыклы,  чөнки китапханәнең туган якны өйрәнү бүлегендә эшлим. Бүгенге диктант –  белемнәремне сынап карау өчен бер форсат ул. Күп сорауларга җиңел генә җавап бирүемә бик тә сөенәм, – диде ул.