Каз өмәсе гөрли авылларда

Бу ялларда авылларда каз өмәләре гөрләде.
Кадыбаш авылында Фәрит-Фәридә КАЮМОВЛАР да 30 баш каз үстергәннәр. Борынгыдан килгән йоланы яңартып алар өмәне Мәдәният йортында уздырдылар. Авыл апайлары иртәнге сәгатьләрдә үк клубка җыелдылар. Мичтә пешкән белен белән чәй эчкәннән соң эшкә керештеләр. Әнә, Мәрзия, Зәкия, Мөкатдисә, Фаягөл, Газилә апаларның кулларына күз иярми. Күз ачып йомганчы 2-3 казны йолкыдылар алар. Ә яшь кызлар бу арада канат "суйдылар", башларын чистарттылар. Күмәкләшеп җырлау эшкә дәрт өстәде, 70 яшьлек әбиләр хәтта биеп тә алдылар. Аннан бизәкле көянтәләргә асып казларны елгага юарга алып төштеләр.
Эшләр тәмамланганнан соң аш-бәлеш ашап, чәй эчеп өйләренә таралыштылар.