Кояш баткач идән юарга ярыймы?

Казанның «Гаилә» мәчете имам-хатыйбы Рөстәм хәзрәт Хәйруллин кояш баткач идән юарга ярыймы дигән сорауга җавап бирде.

«Әниләр һәм әбиләр кич белән өй җыештырырга ярамый, дип әйтә. Бу дөресме?» - дип сорый укучылар.

Хәзрәт искәрткәнчә, диндә идәнне ничек юарга, киемнәрне кайсы ягын әйләндереп киптерергә кебек сорауларга аерым җавап юк.

«Мөһәммәд Пәйгамбәр кич белән кайткач өй җыештырган, чапанын юган, аны тегеп тә куйган», - дип сөйли.

Хәзрәт өлкәннәрнең сүзләрен тыңларга чакыра, аларның сүзләрендә зирәклек булуын искәртә. «Кич белән җыештырганда без барысын да күреп бетермәскә мөмкин. Киемне кире ягын әйләндереп элмәсәк, ул төсен югалтырга мөмкин», - ди ул.

«Кич белән өй җыештыруның гөнаһы юк. Җомга намазы, бәйрәм намазы вакытында гына өй җыештырырга, сату-алу белән шөгыльләнергә ярамый», - ди хәзрәт.

Чыганак: Интертат 

Фото: pixabay.com