Министр Әгерҗе районы җитәкчеләренә Рәхмәт белдерде

2015 елда Әгерҗе районында 20 мең квадрат метр торак тапшырылды. Торак йортлар төзүдәге уңышлары өчен район башлыгы Валерий Макаров һәм район башкарма комитеты җитәкчесе Андрей Авдеев адресына Татарстан Республикасы төзелеш, архитектура, торак-коммуналь хуҗалык министры Ирек Фәйзуллиннан Рәхмәт хаты килде. Анда мондый сүзләр бар:

"Татарстанстатның якынча мәгълүматлары буенча 2015 елда Татарстанда 2405,5 мең квадрат метр торак кулланылышка тапшырылган. Бу - 102 процент дигән сүз. Шул уңайдан сезгә һәм сезнең коллективка 2015 елда торак тапшыру күрсәткечләрен уңышлы үтәгәнегез һәм торак төзелеше өлкәсендә нәтиҗәле хезмәттәшлек иткәнегез өчен тирән рәхмәтемне җиткерәм", диелә әлеге хатта.