“Таң“ кызлары-йолдызлары

Оешмага Салагыш, Уразай, Чилчә, Кадрәк, Ташлы, Маяк, Красный бор, хәтта Алабугадан килеп эшлиләр. Аларны кайнар аш белән тәэмин итү - "Таң" ашханәсе хезмәткәрләре җаваплылыгында. Ашханәдә уңган-булган, җитез, өлгер алты хатын-кыз эшли. Гөлнара Закирова, Әлфия Әхмәдиева, Вәсимә Мөхәммәтҗанова, Ләйсән Исмәгыйлева, Фирзилә Сабирҗанова, Татьяна Панова һәм аларның җитәкчеләре Әлфия Рәхмәтуллина турында бары мактау сүзләре генә ишетәсең. Ике сменада эшләүче аш-су осталары - иртәнге сәгать алты тулганчы ук эш урынында. Иртәнге чәйгә кайнар коймак, ризыклар телеңне йотарлык була. Төшке ашка меню тагын да байый. Кичкә бик тәмле итеп төрледән-төрле итле ризыклар әзерлиләр. Нефтьчеләр, юлчылар гына түгел, авыл халкы да керә ашханәгә. Ә кызлар һәркемне ачык йөз белән каршы алалар, тиз генә хезмәт күрсәтеп, сыйлап чыгаралар.

Ашханә кызлары пешергән икмәкне дә авыл халкы бик яратып ала. Ямурза икмәген башка авыллардан да килеп алучылар бар. Хәтта Алабугадан килеп эшләүчеләр дә өйләренә алып китәләр. Аш-су осталары заказ буенча салатлар да ясыйлар, тавык, каз, үрдәк кыздыралар, берсеннән-берсе тәмле камыр ашлары да әзерлиләр. Авыл халкы алар пешергән кәбестә бөккәне, татлы күмәчләр, йомырка һәм җимеш бәлешләре, кыстыбыйны бик яратып ала.

Менә шулай, бик күпләрдән рәхмәт ишетеп уза "Таң" ашханәсе хезмәткәрләренең эш көне. Сез дә Ямурза якларына килеп чыксагыз, "Таң" кызлары-йолдызлары ашханәсенә керми китмәгез.