Татарстанда бер бомж банк таларга җыенган

Татарстанда банк таларга җыенган сукбайны тоткарлаганнар. Бу хакта ТР буенча Росгвардия идарәсенең матбугат хезмәтеннән хәбәр иттеләр.

Кичә көн уртасында бер банк бүлегенә исерек хәлдәге ир-ат кергән һәм кассирдан, пычакка охшаган әйбер белән янап, акча бирүен таләп иткән. Банк хезмәткәре югалып калмаган, хәвеф төймәсенә баскан һәм бу хакта ир-атка хәбәр иткән. Шуннан соң тегесе тиз генә бинадан чыгып, билгесез юнәлештә юкка чыккан.

Урынга килгән росгвардиячеләр, ир-атның билгеләрен ачыклап, аны эзләргә керешкән. Аны күршедәге йортта табып алганнар. 26 яшьлек сукбайның инде моңа кадәр дә хөкемгә тартылган булуы ачыкланган.

Ир-аттан пычакка охшаган әйберне алып, тәртип сакчылары аны полиция бүлегенә тапшырган. Сукбайга карата «Талау» маддәсе буенча җинаять эше кузгатылган.

Чыганак

Фото: https://pixabay.com/ru/photos/