Участок вәкиле йортлы булачак

Район үзәгенә иң ерак урнашкан Кадыбаш һәм Бима авылларында эшләүче полициянең участок вәкилләренә быел республика программасы кысаларында модульле йорт төзү планга кертелгән иде. Кадыбаштагы йорт төзелеше ахырына якынлаша.
Биредәге йортны төзүгә акча республика бюджетыннан бирелде. Дөрес, финанс белән тоткарлыклар булу сәбәпле, төзүчеләр төп эшләрне август аенда гына башкардылар. Әмма Илнур Мифтахиев җитәкчелегендәге "СтройГрад" төзүчеләре эшне кызу тоталар. Алар инде йортның түбәсен ябу белән мәшгульләр.
Йортның гомуми мәйданы 72,9 квадрат метр. Планировкасы да участковый гаиләсе күңеленә хуш килердәй. Бер ягында кухня, өч бүлмә, ванна, бәдрәф булачак. Икенче ягындагы эш кабинетында участок вәкиле халыкны кабул итәчәк.
Әлеге яңа йортта шушы җирлектә эшләүче Рамис Нәбиуллин яшәр дип планлаштырыла.
17 ноябрьдә участок уполномоченныйлары хезмәтенә 90 ел тула. Әлеге юбилейга әлеге йортны кулланышка тапшырачаклар. Ул авыл участок вәкиленә һәм аның гаиләсенә менә дигән бүләк булачак.