Уйларым һәм хисләрем халык белән

Әлеге кичәнең бу мәктәптә узуы очраклы түгел. Чөнки мәктәп Таҗи Гыйззәт исемен йөртә, биредә аның музее эшли, драматург һәйкәле дә белем йорты ишегалдына урнашкан. Районыбызның "Күңел чишмәләре" әдәби-иҗат берләшмәсе әгъзалары, Казан кунаклары - "Әдәби хәзинә" тапшыруын әзерләүчеләр, район мәгариф идарәсе начальнигы Вәсилә Сафиуллина районыбызның йөзек кашы Таҗи Гыйззәтне искә алдылар, безнең төбәктән әдәбият күгендә балкучы йолдызларның күп булуы белән горурлануларын белдерделәр.

Таҗи Гыйззәт 37 драма әсәре язып калдырган. Аларның күбесе сәхнәләрдә уйналган. Укучыларның әсәрләрдән өзек күрсәтүләре, кичәне җырлар белән бизәүләре ямь өстенә ямь булды. 3нче мәктәпне тәмамлаган Әгерҗе кызы Дилә Мәрданованың "Әдрән диңгез" җырын башкаруы сокландырды.

Соңыннан Таҗи Гыйззәт музеена экскурсия оештырылды.

- Әдәбият елында менә шундый күңелләргә үтеп керерлек кичәләр ешрак булсын иде. 3нче мәктәп коллективына, татар теле укытучыларын, укучыларга зур рәхмәтебезне җиткерәбез, - диде районыбыз шагыйрәсе Әлфирә Низамова.