Әгерҗе хәбәрләре
  • Рус Тат
  • “Яңарыш“ - әгерҗелеләр кулында

    Узган гасырның 90нчы елларында Удмуртия җирендә сибелеп яшәүче татарларны йокыдан уяткан, чит төбәкләрдә яшәүче милләттәшләребездә, бигрәк тә шәһәрдә яшәүче балаларда туган телгә, күркәм йолаларыбызга мәхәббәт уятучы, татар телендә иҗат итәргә этәрүче каләмдәш дусларыбыз "Яңарыш" газетасының 25 еллык юбилейларын бәйрәм иттеләр. Чирек гасырлык юбилей тантаналары Удмуртия җитәкчелеге, Казан, Чаллыдан, Сарапул, Можга...

    Узган гасырның 90нчы елларында Удмуртия җирендә сибелеп яшәүче татарларны йокыдан уяткан, чит төбәкләрдә яшәүче милләттәшләребездә, бигрәк тә шәһәрдә яшәүче балаларда туган телгә, күркәм йолаларыбызга мәхәббәт уятучы, татар телендә иҗат итәргә этәрүче каләмдәш дусларыбыз "Яңарыш" газетасының 25 еллык юбилейларын бәйрәм иттеләр.
    Чирек гасырлык юбилей тантаналары Удмуртия җитәкчелеге, Казан, Чаллыдан, Сарапул, Можга һәм Әгерҗедән җыелган иҗатташ дуслар, хәбәрчеләр, "Яңарыш"ны халык арасында таратучылар, газетаны 25 ел буе яратып укучылар, сәхнә осталары катнашында киң колач белән үтте. Газетаны яраткан, аның һәр санын көтеп алган, үзләре дә аны кызыклы итүдә язмалары белән катнашучы хәбәрчеләрнең байтагы Әгерҗе районыннан булуына без сөенәбез генә. Чөнки "Әгерҗе хәбәрләре" һәм "Яңарыш"ның уртак хәбәрчеләре Удмуртиядә яшәүче якташларыбызны газета аша районыбыз тормышы белән таныштырып торалар. Гомумән, "Яңарыш" - Әгерҗе белән Удмуртияне бәйләп торучы басма ул. Аның беренче саннары да Әгерҗе типографиясендә басылды. 12 ел әлеге басманы җитәкләгән, хәзер Казанда Халыклар дуслыгы йорты директоры, ТР Дәүләт Советы депутаты Ирек Шәрипов та - тумышы белән Кырындыдан. Газетаның бүгенге мөхәррире Рәмзия Габбасова да Тугызбуй төбәгеннән. "Яңарыш" та эшләүче Гүзәл Шакирова, Альбина Шәйхетдинова, Рафилә Рәсүлева, Ләйсән Әхмәтова, Эльвира Вахитова, Нәзир Ногманов та - Әгерҗе районы авылларыннан. Кыскасы, Удмуртиядә нәшер ителүче бердәнбер татар басмасы "Яңарыш" - әгерҗелеләр кулында һәм без аларга "Афәрин! Булдырасыз!" дибез.
    Бәйрәм сәхнәсендә Әгерҗедән килгән хәбәрчеләрне дә хөрмәтләделәр. Ә Алабуга районара почтамтының подписка участогы инструкторы җитәкчесе Мөнирә Рахмаева "Яңарыш"ны Әгерҗе районы халкы арасында пропагандалауга, укучыларын арттыруга күп көч куйганы өчен "Татмедиа" АҖнең Рәхмәт хаты белән бүләкләнде.
    Ут күршеләребезне юбилейлары белән котлап, Иж-Бубыйның республикада танылган "Хыял" бию төркеме дәртле чыгышы белән залны таң калдырды.
    Әнә шулай, Удмуртиядәге каләмдәшләребез белән аларның шатлыкларын уртаклашып, иҗади дуслыгыбызны тагын да ныгытып кайттык. Ә алда - "Әгерҗе хәбәрләре"нең 85 еллык олы юбилее!
    Рәмзия ЗАРИПОВА.

    Районыбызга кагылышлы яңалыклар белән безнең  Telegram-каналдан танышыгыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: