(Казан, "Татар-информ", Диана Авакян). Әгерҗе шәһәр Советы депутаты Марсель Шахмин Татарстанда хайваннар чыгыш ясый торган циркларны тыярга тәкъдим итте. Бу хакта ул "Татарстан – Яңа гасыр" республика иҗтимагый хәрәкәте Югары советы утырышында әйтте.

"Яшьләр миннән Татарстан Дәүләт Советы Рәисе Фәрит Мөхәммәтшин һәм депутатлар алдында тәкъдимебезне яңгыратырга сорады", – дип мөрәҗәгать итте ул утырышта катнашучыларга.

"Хәзер хайваннар катнашындагы циркларны тыю турында җәмгыятьтә фикер алышулар бара. Андый циркларны аерым республика, төбәк эчендә тыю мөмкинлеген карарга тәкъдим итәләр", – диде ул.

"Татарстан мондый карар кабул иткән беренче төбәк булырга мөмкин", – диде Марсель Шахмин.

Депутат сүзләренчә, районнарда яшәүче кешеләр экологияне һәм хайваннарны яклау мәсьәләләренә битараф түгел, күпләр бу тәкъдимне хуплар дип көтелә.

Бу хакта тулырак: https://tatar-inform.tatar/news/2019/11/15/197008/