Әгерҗе районына беренче солдат кайтты

Районыбызга узган ел көзге чакырылышта иң беренче булып армия сафларына киткән солдат Ринас ӘХМӘДИЕВ кайтты.

Исәнбай егете Екатеринбургта - коры җир гаскәрләрендә хезмәт итте. Аны туган йортында әти-әнисе, дүрт ир туганы сөенеп каршы алдылар.

- Без биш малай үстек. Дүртебез инде солдат каешын булды. Төпчегебез Илсаф та мәктәпне тәмамлагач армия сафларына алыныр дип уйлыйбыз, - ди Ринас.

Кечкенәдән көрәш белән мавыккан, оста волейболчы егеткә армиядә хезмәт итү дә авыр бирелмәгән.

- Әлбәттә, армиянең үз законнары, үз тәртипләре бар. Әмма хезмәт итү әллә ни авыр булды димәс идем, - ди ул.

Екатеринбургта хезмәт иткән авылдашы, күршесе Әлмир Шәрәфиев белән дә бик еш очрашып торганнар. "Авыл яңалыкларын бер-беребездән белә идек", ди Ринас. Иртәгә ул дусты Әлмирне туган авылында каршы алачак.