Татарстанда ял көннәренә көчле кар һәм бураннар көтелә

Шимбә һәм якшәмбе республикада карлы булачак. ТР Гидрометеорология үзәге фаразлары буенча, 7 февральдән 9 февральгә кадәр төбәк берничә актив атмосфера фронты йогынтысында калачак. Алар күп кар яву, бураннар һәм соңгы көннәрдәге каты суыклардан соң бераз җепшекләнү алып киләчәк.

Җомга, 6 февральдә, һава торышы явым-төшемсез була. Көндез һава температурасы -11дән -16 градуска кадәр.

Кискен үзгәреш шимбә, 7 февральдә көтелә. Республика буенча кар явуы күзәтеләчәк, буран булуы ихтимал. Температура акрынлап күтәрелә башлый: төнлә -14тән -19 градуска кадәр, көндез -7дән -12 градуска кадәр.

Якшәмбе, 8 февральдә, карлы һәм җилле һава торышы бураннар белән дәвам итәчәк. Термометр баганалары акрынлап югарырак күтәрелә: төнлә -8дән -13 градуска кадәр, ә көндез -5тән -10 градуска кадәр булуы көтелә.