Бакчада эшләгәндә иң гади, ләкин бик куркыныч хата

Офтальмолог Дмитрий Дементьев «Россия-1» каналында бакчачыларның күрү сәләте белән җитди проблемаларга китерергә мөмкин булган гади, ләкин бик куркыныч гадәте турында сөйләде. Бу турыда киңәшләр сайтында язалар.

Түтәлләрдә эшләгәндә, кеше күзенә чүп үләне, вак бөҗәк эләксә яки арыганлыктан күз яше чыкса, кулларын юып тормыйча, инстинкт буенча күзләрен сөртә. Кулда перчатка булса да, анда туфрак, тузан, үсемлек калдыклары һәм микроорганизмнар була.

Беренче карашка зарарсыз күренгән гамәлнең йогынтысы шактый җитди булырга мөмкин:

1. Күзләрдәге мөгез катлау эпителиеның механик җәрәхәте. Грунт кисәкчекләре, хәтта микроскопиклары да, күзне уганда аның өслеген тырный.
2. Бактерияләр белән зарарлану. Бактерияләр һәм гөмбәчекләр булган пычрак зарарланган өслеккә яисә конъюнктива капчыгына эләгә.
3. Ялкынсыну барлыкка килү. Ялкынсыну процессы (конъюнктивит, кератит, блефарит) – инфекция керү билгесе.

Табиб әйтүенчә, хәтта чиста перчаткалар да куркынычсызлыкны гарантияләми – аларда барыбер күзгә күренми торган пычраклар була.

Күзгә берәр нәрсә эләксә, нишләргә?

Күзләрне умаска. Моның урынына махсус эремә – ясалма күз яше кулланырга кирәк, ди Доктор Дементьев.

Ясалма яшь күзне йомшак кына юа, чүпне чыгара, күзне дымландыра һәм механик зарар китерми. Крандагы яки шешәдәге су күзне дымландыру һәм саклау үзенчәлегенә ия түгел.

Үзең белән ясалма күз яше салынган шешә йөртү һәм бернинди шартларда да пычрак куллар яки перчаткалар белән күзгә кагылмау гадәтен кертергә кирәк. Бу – дача сезоны вакытында күз сәламәтлеген саклау өчен төп кагыйдә булып тора, диелә хәбәрдә.

Чыганак: Интертат