“Әгерҗе хәбәрләре“ район газетасы редакциясе бүләкләр тарата

2024 елның беренче яртыеллыгы өчен “Әгерҗе хәбәрләре“ газетасына сентябрь һәм октябрь айларында язылучылар арасында редакция хезмәткәрләре биш бүләк уйнаттылар.  

Менә алар – бүләк ияләре: 

Кер үтүкләү тактасы – Көчектән Зөфәр МИНҺАҖЕВ.
Кер киптерү җайланмасы – Тирсәдән Зөлфия ТИМЕРГАЛИЕВА.
Чәйнек – Күләгәштән Анатолий АСАНОВ. 
Табалар – Кадыбаштан Фәридә БӘХТИЕВА, Әгерҗедән Валентина ПЕРМИНОВА. 

Көчектән Минһаҗевларга һәм Тирсәдән Тимергалиевларга бүләкне илтеп тапшырдык. 

Зөфәр–Гөлсинә Минһаҗевлар да, Рафис–Зөлфия Тимергалиевлар да гомерләре буе район газетасына язылалар. 

–    Без аны әле дә “Җиңү юлы“ дип атыйбыз һәм бик яратып укыйбыз. Бигрәк тә “Район елъязмасы“ дигән сәхифәнең озын гомерле булуын телибез. Ул – безнең үткәнебез, – ди Зөфәр абый. 

Ул, кайда гына эшләсә дә, алтын куллы, тырыш булуы белән хөрмәт яулаган. Гөлсинә апа – ветеран педагог. Гомер көзләренә якынлашып барсалар да кул кушырып утырмыйлар. Бал кортлары тоталар, күпләп сарымсак үстерәләр. 

Тимергалиевлар да хезмәтләрендә олы хөрмәт яулап лаеклы ялга чыкканнар. 

–    Җомга җитүен көтеп алабыз. Газетаның хәрефен дә калдырмыйбыз, – ди Зөлфия апа. 

Ул квитанцияне җибәрергә ярдәм иткән күршесе Наталья Мифтаховага да олы рәхмәтле. 

–    Кулы җиңел булды. Без бүләкле булдык, – дип елмая Зөлфия апа.   

Без тапшырган бүләкләрдән әле күп еллар файдаланырга язсын сезгә, хөрмәтле укучыларыбыз!