Атлар көтүе карга күмелеп калган

Башкортстанда Хәсән Идиятуллин хуҗалыгында 1500 баш терлек бар. Зур атлар көтүе кышын иректә йөри һәм азык эзләп бик күп аралар уза. Алар төрле урында тоткарланып та калырга мөмкин. Бу юлы атлар карда баткан. РЕН ТВшул хакта хәбәр итте.

Фермерның улы Сәгыйтьҗан Идиятуллин атларның күкрәкләренә кадәр карга батып калуы турында сөйли. Атлар үзләре кар тоткыныннан чыга алмаган.

«Территория зур, атлар бер урында гына тормый. Аларны эзләү кыенлаша. Урмандагы кабаннарның сукмакларына карап та эзлибез», — ди ул.

Атларны эзләү өчен квадрокоптерлар, снегоходлар һәм башка төрле җайланмалар кулланалар. Кайчакта атны куып алып кайталар, кайчакта ат җайланмаларны да вата. Шуңа күрә атны йоклатып, транспортка салып алып кайтабыз, дип сөйли Сәгыйтьҗан.

Хәсән сүзләренчә, абориген башкорт атларының токым үзенчәлеге — алар өйдән бик еракка китә, чөнки алар азыкны мөстәкыйль рәвештә эзләп табарга өйрәнгән, диелә хәбәрдә.

Чыганак