Ут капкан машина эчендә ике нәни бала бикләнеп калган

1 майда көндез Мәскәү өлкәсендәге Ступино шәһәрендә бер машинага ут капкан. Бу вакытта салонда өч һәм дүрт яшьлек ике бала булган. «Комсомольская правда» шул хакта хәбәр итте.

Әти кеше Nissan Almera машинасына кибет янында туктата. Ул ике баласын машинада калдыра, үзе кибеткә кереп китә. Ир-ат берничә минут чиратта тора һәм кибеттән чыга. Шул чакта ул машина капоты астыннан төтен чыгуын, машина салонында ялкын булуын күреп ала.

Ир-ат яна торган машинага ташлана һәм салоннан улларын тартып алырга өлгерә.

«Нәни малайның тәне пешкән, аны хастаханәгә салганнар, икенче бала имгәнмәгән. Тикшерү бара», — дип сөйләгәннәр Мәскәү өлкәсе прокуратурасында.

Тикшерүчеләрнең якынча версиясе буенча, машинаның электр үткәргечләрендә кыска ялганыш булуы яки ут белән саксыз эш итү ихтимал.

Машинадан тимер-томыр өеме генә калган, диелә хәбәрдә. 

Чыганак: Интертат