Шигъри күчтәнәч: Салават әйтүнең хикмәтләре

Салават әйтүчеләрнең хаталары сызылыр,

Һичкайчан фәкыйрьлек күрмәс, игелекләр кылыныр.

Шатлыгы дәвамлы булыр, гөнаһы кичерелер,

Догасы кабул ителер, дошманнары җиңелер.

Салаватны әйтүчеләр морадына ирешер,

Җәннәттә пәйгамбәренә янәшә иптәш булыр.

Салават әйткән кешегә, әйткәнгә бер салават

Аллаһы Тәгалә аңа кылыр ун рәхмәт-савап.

Җәннәт Хәлүбе җимеше татлы, тәмле һәм йомшак,

Салават әйтүчеләргә ашарга булыр рөхсәт.

Мөхәммәткә чын күңелдән салават әйтсә мәҗлес,

Күкнең югарыларына күтәрелә, ди, хуш ис.

Фәрештәләр хәйран калыр гаҗәеп бу хуш искә,

Белә алар: иманлылар җыелган бу мәҗлескә.

Фәрештәнең ике канат: мәшрикътә һәм мәгрибтә,

Бер бәндә салават әйтсә, суга чумар фәрештә.

Йөзеп чыккач өсләреннән тамчы-тамчы су тамар,

Һәр тамчыдан – бер фәрештә, Аллаһыдан бу карар.

Салават әйткән кешегә шушы илаһи затлар

Кыямәт көненә кадәр кылып торыр истигфар.

                                       Асия КОРБАНГАЛИЕВА.