Үзәк урам яңара

Әгерҗенең К.Маркс урамының бер өлешендә капиталь төзекләндерү һәм реконструкция эшләре бару сәбәпле, машиналар йөрү вакытлыча туктатылды.
"Безнең алда "Эссен" кибете яныннан алып "Пограничный" кибетенә кадәр арадагы 2 километрга якын асфальт юлны капиталь төзекләндерү, юл читенә бордюр ташлары кую бурычы тора", - ди "Брус" ширкәтенең райондагы филиалы өлкән прорабы Минсәет Мәһәдиев. Юл төзүчеләр әлеге эшләрне 30 июльгә төгәлләргә ниятлиләр. Чөнки 3 августта Әгерҗенең 75 еллыгы уңаеннан шәһәрдә зур бәйрәм уздыру планлаштырыла. "Бүгенге темп белән эшләгәндә, эшне вакытына бетерү авыр булмаячак", - ди өлкән прораб. Юл төзелешенә 15ләп техника җәлеп ителгән. Ә эшчеләр саны 50гә якын. Алар өчен эш көне иртәнге сәгать алтыларда ук башлана. "Ә менә кайчан тәмамлануы турыдан-туры үзләренә бәйле. Көнлек нормасын үтәмичә беркем дә кайтып китми", - ди җитәкчеләре. Минсәет Мәһәдиев үзе дә һәрчак килеп, ничек эшләүләрен ныклы контрольдә тота.