Яшь гомерләре өзелде

Шимбә көнне Татарстан юлында Әгерҗенең "Спутник" хоккей командасы юл фаҗигасенә очрады. 2001 елгы малайларның Зәйдән Җәлилгә уйнарга барулары иде. Фаҗигадә команда капкачысы - Әгерҗенең 3нче мәктәбе укучысы Никита Еремин һәм ике уенчының әтисе Руфан Галиуллинның гомерләре өзелде.
Команда юлга "Фиат-Дукато" автобусында кузгала. Ә өч уенчы автобус артыннан Руфан Галиуллин машинасында бара. Рус Акташы-Җәлил трассасында "Хендай" машинасы шоферы машиналарны узу нияте белән чыга һәм башта автобуска килеп бәрелә, аннан "Нексиа"ны өстери. Бүген 36 яшьлек Руфан Галиуллинны җирләделәр. Ә иртәгә Әгерҗе халкы 11 яшьлек Никита Еремин белән хушлаша.